Policia e Shqipërisë ka kapur drogë, tritol dhe municion tjetër në Pukë dhe e ka arrestuar një 29-vjeçar.
Siç njoftoi Policia, L.P. e transportoi drogën eksplozivin dhe municionin luftarak drejt Tropojës me anë të një varke. Dërgesa, sipas Policisë, kishte destinacion Kosovën.
“Finalizohet operacioni policor i koduar “Varkëtari”. Transportoi me varkë drejt Tropojës drogë, eksploziv dhe municion luftarak, me qëllim që ta trafikonte drejt Kosovës; vihet në pranga 29-vjeçari nga Puka. Sekuestrohen 1.2 kilogramë lëndë narkotike kanabis, 405 gram tritol, 51 kapsolla detonatore, 5 m fitil zjarrpërcjellës, municion luftarak, si dhe një sasi lekësh. Shërbimet e DVP Kukës, në bashkëpunim me shërbimet e Komisariatit të Policisë Tropojë dhe me mbështetjen e shërbimeve të Forcës së Posaçme “Shqiponja”, bazuar në informacionet e siguruara në rrugë operative se një shtetas do të transportonte drejt Kosovës një sasi lëndë narkotike dhe lëndë eksplozive, organizuan dhe finalizuan operacionin policor të koduar “Varkëtari””, thuhet në njoftim.
Policia thotë se 29-vjeçari u arrestua “në flagrancë”.
“Ky shtetas u kap në flagrancë nga shërbimet e Policisë, në fshatin Dushaj, duke lëvizur me automjetin tip “Volkswagen”, në të cilin kishte fshehur në brendësi të bagazhit lëndën narkotike, eksplozivin dhe municionin luftarak, të cilat dyshohet se i kishte transportuar me varkë nëpërmjet liqenit, nga fshati Apripë, Pukë, deri në Tropojë, ku kishte parkuar automjetin me qëllim shmangien e kontrollit të Policisë”, thuhet në njoftim.
Policia shqiptare thotë se “në bashkëpunim me Prokurorinë dhe me homologët e Kosovës vijon puna për zbardhjen dhe dokumentimin e plotë ligjor të këtij rasti, me qëllim identifikimin dhe kapjen e personit që do t’i blinte në Kosovë”.
“Materialet procedurale i kaluan Prokurorisë, për veprime të mëtejshme”, thuhet në fund të njoftimit.
