Autoritetet ruse deklaruan të premten se numri i të vdekurve nga një sulm me dron, që ata ia atribuojnë Ukrainës, është rritur në 27 persona në fshatin Khorly, në rajonin e Khersonit të pushtuar nga Rusia. Sipas tyre, droni goditi një kafene dhe hotel, ku rreth 100 civilë po festonin natën e Vitit të Ri. Në këtë bilanc, sipas Moskës, përfshihen edhe dy të mitur, ndërsa 31 persona janë shtruar në spital, përfshirë pesë të mitur.
Zëdhënësja e Komitetit Hetimor të Rusisë, Svetlana Petrenko, bëri të ditur se është hapur hetim penal nën akuzën e “aktit terrorist”. Ndërkohë, Ukraina mohoi se ka shënjestruar civilë. Një zëdhënës i Shtabit të Përgjithshëm ukrainas tha se forcat ukrainase respektojnë normat e të drejtës humanitare ndërkombëtare dhe kryejnë goditje vetëm ndaj objektivave ushtarake ruse, infrastrukturës së energjisë dhe objektivave të ligjshme. Ai shtoi se lista zyrtare e objektivave të goditura në natën e Vitit të Ri nuk përfshin zonat e pushtuara të Khersonit, duke akuzuar Rusinë për dezinformim me qëllim prishjen e bisedimeve të paqes.
Në Kiev, presidenti Volodymyr Zelensky njoftoi të premten se ka emëruar shefin e inteligjencës ushtarake, Kyrylo Budanov, si udhëheqës të ri të Zyrës së Presidentit (rol që koordinon çështjet kryesore të sigurisë dhe diplomacisë). Emërimi vjen pas largimit të ish-kreut të zyrës, Andrii Yermak, pas një skandali korrupsioni të lidhur me sektorin e energjisë. Zelensky tha se fokusi i ri do të jetë siguria, zhvillimi i forcave të mbrojtjes dhe rruga diplomatike e negociatave.
Zhvillimet vijnë në kohën kur SHBA po shtyn përpjekjet diplomatike për t’i dhënë fund luftës. Zelensky, në fjalimin e Vitit të Ri, deklaroi se një marrëveshje paqeje është “90% e gatshme”, por se 10% e mbetur – ku përfshihen nyjet më të vështira si territori – do të përcaktojë fatin e paqes dhe të sigurisë në Evropë. Ndërkohë, i dërguari i posaçëm i Trumpit, Steve Witkoff, tha se janë zhvilluar kontakte me këshilltarë të sigurisë nga Britania, Franca, Gjermania dhe Ukraina për “hapat e radhës” në procesin evropian të paqes.
Në terren, autoritetet ukrainase raportuan se Rusia kreu një nga sulmet më masive me dronë ndaj Zaporizhzhias, duke dëmtuar dhjetëra ndërtesa banimi dhe infrastrukturë civile, pa viktima. Sipas Forcave Ajrore të Ukrainës, Rusia lëshoi 116 dronë gjatë natës, ku 86 u rrëzuan, ndërsa 27 arritën objektivat. Nga ana tjetër, Ministria ruse e Mbrojtjes pretendoi se ka rrëzuar 64 dronë ukrainas mbi rajone të ndryshme të Rusisë, ndërsa guvernatori i Belgorodit akuzoi Ukrainën edhe për një goditje me raketë, me dy gra të shtruar në spital.
