Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, ka adresuar kritika të ashpra ndaj Qeverisë gjatë seancës së jashtëzakonshme të Kuvendit, të thirrur për të diskutuar mbi shtrenjtimin e naftës.
Tahiri vuri në dukje se, për dallim nga shumë vende të botës dhe rajonit që po ndërmarrin hapa konkretë për të zbutur efektet e krizës globale, Kosova po mbetet pasive përballë rritjes së kostos së jetesës për qytetarët.
Deputeti i AAK-së përmendi shembujt e shteteve evropiane dhe atyre fqinje si model se si duhet reaguar në situata të tilla emergjente.
“Italia ka marrë vendim për pako mbështetëse, Spanja gjithashtu. Kanë ndërmarrë veprime edhe vendet e rajonit: Maqedonia e Veriut, Mali i Zi dhe Shqipëria. A mund të dimë pse ne jo? A jemi ne vendi më i pasur në Evropë që nuk po marrim veprime”?, pyeti Tahiri nga foltorja e Kuvendit.
Thirrja për reagim urgjent Tahiri kërkoi nga ekzekutivi që të lërë anash arsyetimet dhe të vijë me një plan të qartë ndërhyrjeje, qoftë përmes lehtësimeve fiskale apo pakove direkte mbështetëse, me qëllim që të parandalohet rëndimi i mëtutjeshëm i gjendjes ekonomike të familjeve kosovare.
Kjo seancë vjen pas rritjes rekorde të çmimeve të derivateve në ditët e fundit, gjë që ka nxitur reagime të shumta nga opozita dhe shoqëria civile.
