Komisioni Qendror i Zgjedhjeve (KQZ) ka njoftuar se ka filluar të ofrojë shërbimin për ndërrimin e qendrës së votimit brenda komunës edhe në periudhë jozgjedhore, duke u bazuar në detyrimet e ligjit të ri për zgjedhjet e përgjithshme.
Ky shërbim ka për qëllim t’u lejojë votuesve që ta caktojnë qendrën e tyre të votimit sa më afër vendbanimit, brenda të njëjtës komunë. Sipas KQZ-së, ky proces është plotësisht në vullnetin e qytetarëve që e shohin të nevojshme një ndryshim të tillë për lehtësimin e pjesëmarrjes në zgjedhje.
Si mund ta ndërroni qendrën e votimit? Gjatë kësaj periudhe, qytetarët me të drejtë vote mund të verifikojnë qendrën e tyre aktuale dhe ta ndërrojnë atë përmes dy mënyrave:
-
Online: Përmes platformës elektronike të KQZ-së në adresën: https://qv.kqz-ks.org
- Advertisement - -
Fizikisht: Duke paraqitur kërkesën në Zyrën e Komisionit Komunal të Zgjedhjeve në komunën përkatëse.
Pas paraqitjes së kërkesës, ajo do të trajtohet brenda një afati të shkurtër dhe votuesi do të njoftohet zyrtarisht për ndryshimin.
Po nëse ndërroni komunën? Për dallim nga ndërrimi brenda komunës, kalimi në një qendër votimi në një komunë tjetër nuk mundësohet drejtpërdrejt nga KQZ-ja. Ky proces është i ndërlidhur me deklarimin zyrtar të vendbanimit.
Votuesit që ndërrojnë adresën e tyre në Zyrën e Gjendjes Civile apo përmes platformës e-Kosova, do të shohin reflektimin e adresës së re në Regjistrin Qendror Civil. Pas këtij konfirmimi, ndryshimi do të pasqyrohet automatikisht në platformën e KQZ-së dhe rrjedhimisht në Listën Votuese.
