Kryetari i Bashkimit Demokratik për Integrim (BDI), Ali Ahmeti, është takuar me kryeministrin e Shqipërisë, Edi Rama, në një takim ku boshti qendror i diskutimit ishte koordinimi dhe bashkëpunimi mes shqiptarëve në rajon.
Përmes një njoftimi në llogarinë e tij zyrtare në Facebook, Ahmeti bëri të ditur se me kryeministrin Rama ka zhvilluar një bisedë të hapur mbi çështjet me interes të përbashkët, duke vënë theksin te ruajtja e vlerave kombëtare.
„Si gjithmonë, kënaqësi e veçantë takimi me kryeministrin e Shqipërisë, mikun tim Edi Rama. Bisedë e hapur për çështje me interes të përbashkët, me fokus në forcimin e bashkëpunimit ndërshqiptar, ruajtjen e vlerave tona kombëtare dhe avancimin e perspektivës evropiane të rajonit”, deklaroi Ahmeti.
Lideri i BDI-së nënvizoi se ky bashkëpunim mbetet i palëkundur në shërbim të unitetit dhe zhvillimit të përbashkët drejt të ardhmes në familjen evropiane.
Takimi vjen në një periudhë me rëndësi për zhvillimet politike në Ballkanin Perëndimor, ku Shqipëria dhe Maqedonia e Veriut po kërkojnë të përshpejtojnë reformat për integrim të plotë në Bashkimin Evropian.
