Kryeministri i Kosovës, Albin Kurti, është deklaruar sot për media lidhur me zhvillimet e fundit rreth procesit të zgjedhjes së presidentit të ri të Republikës.
Gjatë një prononcimi, kreu i ekzekutivit konfirmoi se qeveria është në një proces aktiv komunikimi me kryetarët e partive opozitare për të gjetur një gjuhë të përbashkët që do të zhbllokonte procesin parlamentar.
“Jemi në komunikim me kryetarët e partive opozitare. Kur të ketë rezultate konkrete, atëherë do t’ju njoftojmë menjëherë”, ka thënë Kurti shkurtimisht para gazetarëve.
Ky komunikim vjen në një moment kritik, kur afatet kushtetuese kërkojnë një konsensus sa më të shpejtë për të shmangur mundësinë e zgjedhjeve të parakohshme. Deri më tani, diskutimet po mbahen në nivel takimesh konsultative, ndërsa mbetet të shihet nëse palët do të arrijnë një marrëveshje për emrin e propozuar për postin e kreut të shtetit.
