Në mbarë botën sot shënohet Dita Botërore e Pronësisë Intelektuale, e cila këtë vit i kushtohet rolit të muzikës dhe krijimtarisë artistike në zhvillimin ekonomik dhe kulturor.
Tema e këtij viti, “Pronësia Intelektuale dhe Muzika: Ndjeje ritmin e IP-së” (“IP and Music: Feel the Beat of IP”), vë në pah rëndësinë e mbrojtjes së të drejtave të autorit për artistët, producentët dhe industrinë muzikore në përgjithësi.
Kjo ditë është themeluar nga Organizata Botërore e Pronësisë Intelektuale (WIPO), e cila thekson se të drejtat e pronësisë intelektuale janë thelbësore për nxitjen e inovacionit dhe krijimtarisë.
Sipas WIPO, çdo vit në nivel global paraqiten mbi 3.5 milionë aplikime për patenta dhe mbi 15 milionë aplikime për marka tregtare, duke dëshmuar rritjen e vazhdueshme të inovacionit.
Industritë kreative, përfshirë muzikën, luajnë rol të rëndësishëm në ekonomi, duke kontribuar ndjeshëm në punësim dhe në Prodhimin e Brendshëm Bruto në shumë vende.
Dita Botërore e Pronësisë Intelektuale synon të rikujtojë rëndësinë e mbrojtjes së ideve dhe krijimeve, duke inkurajuar një mjedis më të sigurt për artistët dhe inovatorët në gjithë botën.
