Shtetet e Bashkuara kanë ndërmarrë një goditje të re ushtarake brenda territorit iranian, duke shënjestruar dy lëshues të Gardës Revolucionare në ishullin strategjik Larak, në hyrje të Ngushticës së Hormuzit.
Sipas CENTCOM-it, forcat amerikane kishin vërejtur njësi të IRGC-së duke përgatitur lëshues për raketa që do të përdoreshin për vendosjen e minave detare në ujërat e Hormuzit. Komanda Qendrore amerikane e përshkroi operacionin si një veprim “të kufizuar dhe preciz” kundër forcave iraniane të minimit që, sipas Washingtonit, përbënin një kërcënim të menjëhershëm për lundrimin.
Goditja është veçanërisht e rëndësishme sepse ushtria amerikane kishte njoftuar vetëm pak ditë më parë se kishte përfunduar pastrimin e minave nga korsia kryesore ndërkombëtare e transportit në Ngushticën e Hormuzit. SHBA kishte paralajmëruar më herët Teheranin se çdo përpjekje për vendosjen e minave të reja do të përballej me reagim ushtarak.
Reuters raporton se sulmi amerikan goditi pikërisht dy lëshues në Larak. Garda Revolucionare iraniane tha se nga goditja pati të vrarë dhe të plagosur dhe premtoi “përgjigje dhe ndëshkim” ndaj SHBA-së.
Dhe kundërpërgjigjja erdhi shpejt: Irani lëshoi më pas raketa balistike drejt forcave amerikane në Jordani, duke e lidhur edhe më drejtpërdrejt episodin e Hormuzit me përshkallëzimin e ri SHBA–Iran.
PSE ËSHTË LAJM I MADH?
Sepse përplasja nuk është vetëm ushtarake. Hormuzi është një nga korridoret më strategjike të energjisë në botë. Çdo rikthim i minave detare mund të rrisë rrezikun për transportin tregtar dhe tregjet globale të energjisë. Axios e cilëson goditjen si të parën të njohur amerikane brenda Iranit që nga fundi i korrikut.
