Dëshmitari/ i dëmtuari Bajrush Xhemaili, duke dëshmuar për torturat që kishte përjetuar si i burgosur në burgun e Lipjanit, tha para Gjykatës Themelore në Prishtinë, se kur ishte dërguar në burg bashkë me të burgosurit e tjerë, aty policët dhe zyrtarët e burgut kishin bërë një kordon dhe bënin sjellje mizore ndaj të burgosurve.
“Përmes atyre rreshtave kanë pas me kalu të burgosurit dhe na godisnin me aq sa mundnin, e mjerë ai që rrëzohet, se nuk të çon askush dhe ashtu rrëzohu e çohu derisa të mbërrish”, ka thënë dëshmitari Xhemaili në seancën e së premtes.
Në këtë rast, Dragisha Milenkoviq po akuzohet se në cilësi të gardianit në burgun e Prishtinës dhe Lipjanit, ka torturuar në mënyrë ç’njerëzore të burgosurit, raporton “Betimi për Drejtësi”.
Xhemaili, i cili është njëherësh ish-kryetar i Ferizajt dhe ish-deputet, deklaroi se maltrimet kanë vazhduar edhe brenda korridoreve të burgut, ku policët kanë pritur me dy shufra metalike dhe i kanë goditur më shumë tek pjesa e kokës derisa kanë shkuar në qelinë e burgut.
Sipasa tij, në qeli kanë qenë 30 veta dhe se nuk ka pasur as rregulla e as rend.
“…. aty nuk ka pasur rregulla, kemi qenë rob, as rend shtëpie, as bukë s’ka dhënë kush”, tha ai.
Dëshmitari Xhemajli ka deklaruar se trajtimi ka qenë shumë i rëndë dhe i kanë pasur vetëm dy dyshekë dhe ¼ e bukës dhe një tas me një lloj supe për pesë veta, duke e ndarë disi mes vete.
I pyetur nga prokurori special Atdhe Dema, dëshmitari Xhemajli tha se nuk i kujtohet nëse e ka parë tani të akuzuarin Dragisha Milenkoviq në burgun e Lipjanit, pasi që nuk ka qenë i përqendruar se kush ka qenë.
Mirëpo, tha se ka dëgjuar nga të tjerët se Milenkoviq i kishte torturuar. Tha se drejtor i burgut ka qenë Ljubomir Çimburoviç.
Xhemaili tha se kordoni në të cilën kanë kaluar në burgun e Lipjanit ka qenë diku rreth 30 metra me mbi 50 persona me uniforma dhe se shumica dërmuese kanë qenë gardianë, të cilët kanë qenë shumë mizorë.
Aktakuza e ngritur më 26 dhjetor 2023 nga Prokuroria Speciale e Republikës së Kosovës, ngarkon Dragisha Milenkoviqin se në cilësinë e gardianit të Burgut të Prishtinës dhe Lipjanit, gjatë periudhës së luftës në Kosovë 1998-1999, në Burgun e Prishtinës dhe të Lipjanit, në bashkëkryerje edhe me zyrtarë tjerë të burgjeve në fjalë Ljubomir Çimburoviç, ish-drejtor i Burgut të Qarkut në Prishtinë, Predrag Bradiq dhe Milivoje Iviq, ish-gardianë të Burgut të Prishtinës dhe Lipjanit, në mënyrë sistematike i kishin maltretuar të burgosurit shqiptarë, duke i torturuar në mënyrë ç‘njerëzore me mjete të ndryshme si shkop gome, shufra metalike, kabllo elektrike, gypa të ujit, shqelma e grushte, deri në alivanosje, duke iu shkaktuar lëndime trupore, ashtu siç e shpjegojnë vetë viktimat, se pas këtyre rrahjeve kishin pasur dhimbje të mëdha në gjithë trupin, dhunë psiqike, i kanë lënë pa ngrënë për gati një javë, i kanë kanosur seriozisht për jetë e si pasojë e kësaj dhe rrahjeve të vazhdueshme kanë pësuar gjendje ankthi dhe frikë.
Aktakuza thotë se Milenkoviq, nga 24 maj 1999 deri më 10 qershor 1999, në Burgun e Lipjanit, në cilësinë e personit zyrtar dhe në bashkëkryerje edhe me zyrtarë tjerë të burgjeve në fjalë Çimburoviç, Bradiq dhe Iviq, pasi i kanë transferuar të burgosurit shqiptarë nga Burgu i Dubravës në Burgun e Lipjanit, fillimisht kishin formuar kordon në hyrje të burgut nga të dyja anët, ku të burgosurit ishin detyruar që të kalonin përmes kordonit, e pastaj kishin filluar që t’i godasin me mjete të ndryshme si shkop gome, grushte e shqelma.
Gjithnjë sipas aktakuzës, pas kësaj në mënyrë sistematike kishin keqtrajtuar të burgosurit shqiptarë, duke torturuar në mënyrë ç‘njerëzore, maltretuar, shkaktuar lëndime trupore dhe siç e shpjegojnë vetë viktimat, pas këtyre rrahjeve kishin pasur dhimbje të mëdha në gjithë trupin, dhunë psiqike, i kanë lënë pa ngrënë për ditë të tëra, i kanë ofenduar e sharë dhe i kanë kanosur seriozisht për jetë se do i vrasin të gjithë, veprime këto të cilat kanë shkaktuar gjendje ankthi dhe frike tek ata.
Me këtë, akuzohet se në bashkëkryerje ka kryer veprën penale “Krime lufte kundër popullatës civile” nga neni 142 lidhur me nenin 22 të LP të RSFJ-së.
Milenkoviq ngarkohet edhe se në shtëpinë e tij më 21 qershor 2023, në Graçanicë, gjatë zbatimit të urdhër kontrollit, policia ka gjetur një pistoletë, fishekë, karikatorë, thikë, shufër metalike.
Me këtë, akuzohet se ka kryer veprën penale “Mbajtja në pronësi, kontroll ose posedim të paautorizuar të armëve”, nga neni 366, par.1 të Kodit Penal të Republikës së Kosovës.
