Bashkimi Evropian (BE) edhe një herë u ka bërë thirrje Kosovës dhe Serbisë që të përmbushin obligimet e tyre që rrjedhin nga Marrëveshja për Rrugën e Normalizimit.

Një thirrje të tillë e ka bërë zëdhënësi i BE-së, Peter Stano, në një deklaratë për medie. Duke rikapituluar procesin e dialogut Kosovë-Serbi, Stano ka theksuar se etiketimi i Projektstatutit Evropian si “thjesht një non-paper” shpërfill ftesën e Këshillit të Bashkimit Evropian për të vazhduar mbi këtë bazë dhe vonon më tej perspektivën e krijimit të tij, derisa ka shprehur keqardhje që një vit pasi palët miratuan dokumentin në parim, nuk u bë asnjë përparim në krijimin e tij në përputhje me draft-statutin evropian.

“Në vitin 2013, Kosova nënshkroi Marrëveshjen e Brukselit, e cila u ratifikua nga Kuvendi i Kosovës me shumicë prej dy të tretave. 11 vjet më vonë, Kosova ende nuk i ka ndërmarrë hapat e nevojshëm drejt krijimit të saj dhe për këtë arsye po dështon në përmbushjen e detyrimit të saj të qartë sipas ligjit ndërkombëtar, i cili më pas u përsërit në marrëveshjet e 2015 dhe 2023”, ka thënë Stano.

Sipas tij, në bazë të marrëveshjeve përkatëse të dialogut të 2013 dhe 2015, statuti për themelimin e Asociacionit duhet të hartohet dhe të diskutohet në dialog.

“Çdo propozim duhet të diskutohet me Serbinë dhe ndërmjetësuesin e BE-së dhe të jetë në përputhje me marrëveshjet e vitit 2013 dhe 2015. Kjo gjithashtu do të thotë se Qeveria e Kosovës nuk mund të hartojë statutin jashtë dialogut. Qeveria nuk mund të heqë dorë nga përgjegjësitë e saj në kuadër të dialogut apo t’ua delegojë ato komunave me shumicë serbe të Kosovës”, ka theksuar tutje Stano.

Ai tutje ka thënë se në tetor 2023, në një përpjekje për të çuar përpara procesin e normalizimit, BE-ja – e mbështetur nga shtetet anëtare dhe partnerët e saj si SHBA-ja – prezantoi zyrtarisht një projekt-statut evropian për krijimin e ASM-së.

“Ky draft-statut evropian bazohet në modelet dhe praktikat e mira evropiane, si dhe në kornizën ligjore të Kosovës. Drafti iu dorëzua kryeministrit Kurti personalisht nga ndërmjetësi i BE-së së bashku me këshilltarët e Sigurisë Kombëtare të Francës, Gjermanisë dhe Italisë si dhe Përfaqësuesin Special të SHBA-së. Në një takim të nivelit të lartë në mbështetje të dialogut në prani të presidentit Macron, kryeministres Meloni dhe kancelarit Scholz, të dyja palët pranuan në parim draft-statutin evropian. Në konkluzionet e tij të dhjetorit 2023, Këshilli Evropian përshëndeti “gatishmërinë e Serbisë dhe Kosovës për të pranuar draft-statutin e paraqitur palëve nga Lehtësuesi i BE-së”. Ky është një njohje zyrtare e dokumentit nga të 27 Shtetet Anëtare të BE-së”, ka thënë Stano.

Sipas tij, etiketimi i projektstatutit Evropian si “thjesht një non-paper” shpërfill ftesën e Këshillit të Bashkimit Evropian për të vazhduar mbi këtë bazë dhe vonon më tej perspektivën e krijimit të tij.

“Na vjen keq që një vit pasi palët miratuan dokumentin në parim, nuk u bë asnjë përparim në krijimin e tij në përputhje me Draft Statutin Evropian. Në përputhje me riangazhimin e saj zyrtar ndaj dialogut dhe zbatimin e plotë të të gjitha marrëveshjeve të dialogut të 20 shtatorit 2024, ne i bëjmë thirrje Kosovës që të ecë përpara me themelimin e saj pa vonesa të mëtejshme. Serbia pritet të përmbushë obligimet e saj që rrjedhin nga Marrëveshja për Rrugën e Normalizimit, paralelisht me Kosovën që të ecë përpara me themelimin e Asociacionit bazuar në draft-statutin evropian, në përputhje me planin e zbatimit të propozuar nga lehtësuesi i BE-së”, ka nënvizuar Stano.

Sekretari i Përgjithshëm i NATO-s, Mark Rutte, ka thënë se Italia është një nga themeluesit e NATO-s.

Në një konferencë për media, ai ka folur kështu pas takimit që e pati me kryeministren e Italisë, Giorgia Meloni.

Ndër tjera, ai shtoi se Italia është duke ndihmuar në shtimin e stabilitetit edhe në Ballkanin Perëndimor, duke udhëhequr misionin e NATO-s, KFOR, për një mandat.

“Italia është një aleat i vendosur dhe i besueshëm. Ju po kontribuoni në shumë mënyra për sigurinë euroatlantike. Ju drejtoni grupin e ri të betejës të NATO-s në Bullgari. Ju vazhdoni të siguroni trupa për dislokimet e NATO-s, siç thatë, në Hungari dhe Letoni”, raporton Klankosova.

“Avionët tuaj mbrojnë hapësirën ajrore të NATO-s dhe marina juaj i mban të hapura rrugët kryesore detare. Italia po udhëheq edhe një herë misionin tonë paqeruajtës në Kosovë, KFOR, duke ndihmuar në nxitjen e stabilitetit në Ballkanin Perëndimor”, ka thënë Rutte.

Inspektorati Policor i Kosovës njofton se mbrëmë ka arrestuan një zyrtar doganor dhe një zyrtar  policor të dyshuar për marrje ryshfeti. Task Forca e përbashkët Doganë-Polici, se në zbatim të masave për parandalim dhe luftimin e paligjshmërisë dhe kontrabandës, kanë identifikuar një rast korrupsioni ku të dyshuar ishin një zyrtar doganor dhe një zyrtar policor.

Bëhet e ditur se menjëherë pas dyshimit se zyrtarët në koordinim merrnin pagesa të jashtë ligjshme u njoftua Inspektorati Policor i Kosovës dhe njësitë relevante të Doganës të cilët në koordinim realizuan arrestimin  e një zyrtari doganor dhe një zyrtari policor për përfshirje në aktivitete të kundërligjshme.

“Të dy zyrtarët u ndaluan nën dyshimin se kishin bashkëpunuar për marrje të parave nga drejtues të kamionëve për të lehtësuar kalimet nëpër Pikën Kufitare Hani i Elezit. Dy të arrestuarit do të përballen me procedurat ligjore në përputhje me dispozitat e Kodit Penal të Republikës së Kosovës dhe  të njëjtëve me aktvendim të prokurorit u është caktuar masa e ndalimit për 48 orë”, thuhet në njoftimin e Inspektoratit Policor të Kosovës.

Ky aksion është rezultat i përkushtimit të vazhdueshëm të institucioneve për të luftuar korrupsionin dhe për të mbrojtur integritetin e sistemit doganor dhe policor të Kosovës.

Task Forca Doganë-Polici thotë se mbetet e angazhuar në mënyrë të vendosur për të çrrënjosur çdo formë të sjelljes së paligjshme dhe për të siguruar mbrojtjen e interesave të qytetarëve dhe të ekonomisë së vendit.

Në tetë vjetorin e vdekjes së Astrit Deharit pranë varrit të tij u vendosën kurora me lule dhe njëherësh u kërkua drejtësi për zbardhjen e rastit.

Familjarë, përfaqësues të institucioneve dhe qytetarë vendosën kurora me lule tek varri i Astrit Deharit, ndërsa mos-zbardhjen e vrasjes së tij e konsiderojnë goditje për studentët, për lëvizjen dhe mbarë rininë shqiptare.

“Katër prokuror e kishin rastin e mbytjes në burgun e Prizrenit të Astrit Deharit. Ata dolën në pension pa e kryer punën. Tash është prokurori i pestë i cili e ka marrë rastin”, tha kryeministri Albin Kurti.

Ai shtoi se qeveria është e gatshme që ta ndihmojë me krejt potencialin Prokurorinë e Shtetit për të sjellë drejtësi për Astrit Deharin dhe për familjen e tij.

Ndërkaq babai i Astritit, Avni Dehari, tha se rasti i Astrit Deharit tash e tetë vjet po keqtrajtohet nga gjyqësia e Kosovës.

“Tetë vjet një njeri që e ka humbur jetën në një institucion të Kosovës të mos zbardhet e vërteta për të flet vet, sepse ata që kanë bërë krimin ndaj Astritit dhe ndaj drejtësisë në përgjithësi edhe sot e kësaj dite mundohen t’i fshehin gjurmët e tyre”, u shpreh ai.

Mos-zbardhja e vrasjes, jo vetëm për Astritin, sipas Avni Deharit, gjyqësia e Kosovës nuk është në nivel dhe Kosova nuk e meriton një gjyqësi të tillë.