Kandidati për kryeministër i koalicionit AAK-Nisma-Konservatorët-E30, Ramush Haradinaj, sot ka vizituar Pejën.

AAK në njoftim tha si atje u takua me “figura të rëndësishme lokale” dhe se ka theksuar rëndësinë e anëtarësimit të Kosovës në NATO.

“Anëtarësimi direkt i Kosovës në NATO përmes Planit Aksional nuk është vetëm çështje sigurie, por edhe një shtysë e rëndësishme për zhvillimin ekonomik të vendit tonë”, deklaroi Haradinaj.

Gjatë qëndrimit në qytet, Haradinaj shprehu mirënjohje për Prof. Ali Sylqa, duke e cilësuar atë si “një nga shtyllat e AAK-së në qytet”.

“Kontributi i tij në themelimin, zhvillimin dhe forcimin e Aleancës në Pejë, për dekada, meriton respektin e mirënjohjen tonë më të thellë.”

Ministrja e Drejtësisë, Albulena Haxhiu, gjatë qëndrimit të saj në Tiranë, u takua edhe me ish-ministren e Drejtësisë së Shqipërisë Etilda Gjonaj, dhe me deputeten Klotilda Bushka-Ferhati.

Sipas nja njoftimi nga ana e ministrisë, në takimin me Gjonaj, Haxhiu diskutoi rreth progresit të arritur në reformën në drejtësi, sfidat dhe problemet që e kanë përcjellë këtë proces praktikat e mira të Shqipërisë dhe të Kosovës.

“Nga përvoja e saj si ish Ministre e Drejtësisë, diskutimi me deputeten Gjonaj ishte dinamik dhe shumë frytdhënës. Ministrja Haxhiu gjatë takimit adresoi edhe hapat e rëndësishëm të Kosovës sa i përket adresimit të rasteve të dhunës në familje, zbatimin e Konventës së Stambollit si dhe veprimet e ndërmarra në fushën e parandalimit, emancipimit dhe adresimit të dhunës me bazë gjinore dhe dhunës në familje”, thuhet në njoftim.

Ndërkaq, gjatë takimit me Bushka-Ferhati, u diskutua rreth bashkëpunimit të shkëlqyer në procese të rëndësishme për Kosovën, sistemin e drejtësisë, Reformën në Drejtësi.

“Ministrja Haxhiu falënderoi Kryetaren e Komisioni të ligjeve, znj. Bushka Ferhati për rekomandimet dhe ndihmën e pakursyer që i ka ofruar Kosovës edhe në raport me nismat për Reformë në sistemin e drejtësisë dhe rrugën për të jetësuar këto nisma sidomos në raport me Komisionin e Venedikut. Në takim u diskutua edhe për zbatimin e marrëveshjeve të nënshkruara ndërmjet dyja vendeve në fushën e profesioneve të lira, si dhe implementimin dhe progresin që është shënuar në raport me to”, thuhet në njoftim.

Në kuadër të vizitës në Montreal të Kanadasë, për pjesëmarrjen në Konferencën Ministeriale për Dimensionin Njerëzor të Formulës së Paqes për Ukrainën, zv/kryeministrja dhe ministrja e Punëve të Jashtme dhe Diasporës, Donika Gërvalla, zhvilloi takim me mërgatën shqiptare në Montreal, të organizuar nga “Shoqata Shqiptare Kosova Montreal”, me kryetare, Ilirjana Latifi.

Ajo ka thënë se lidhja unike që Kosova e ka me diasporën e saj është garancë e zhvillimit të shpejtë të shtetit tonë.

Sipas njoftimit të MPJDF, në fokus të këtij bashkëbisedimi ishin çështjet kyçe si organizimi kulturor dhe mësimi në gjuhën shqipe për fëmijët e diasporës, regjistrimi i mërgatës, si dhe mundësitë e bashkëpunimit ekonomik dhe investimeve të mërgatës në Kosovë.

Më tej, Ministrja Gërvalla theksoi rëndësinë e regjistrimit të popullsisë duke ftuar të gjithë mërgimtarët të marrin pjesë në këtë proces të rëndësishëm për planifikimin e politikave dhe programeve për mërgatën.

“Ministrja Gërvalla paraqiti programet që ofron MPJD për të rinjtë e diasporës duke përfshirë diplomacinë qytetare ku profesionistët e ri vijojnë një program prej 10 muajsh në Kosovë, kontribuojnë në institucionet e vendit, sjellin përvojat e tyre nga më të ndryshmet dhe fuqizojnë lidhjen me Kosovën”, thuhet në njoftim.

Tutje, theksohet se gjatë këtij takimi pati një bashkëbisedim të hapur ku mërgimtarët shprehën pikëpamjet e tyre pozitive rreth proceseve nëpër të cilat po kalon Republika e Kosovës, integrimin euro-atlantik, investimet e mërgatës, shërbimet konsullore, mësimin në gjuhën shqipe dhe rolin e madh të mërgatës në fuqizimin e lidhjeve në mes të Kosovës dhe Kanadasë, duke theksuar posaçërisht krenarinë dhe mbështetjen për shtrirjen e sovranitetit në të gjithë vendin dhe punën e policisë dhe organeve të tjera të sigurisë së Republikës së Kosovës.

Kryeministri i Kosovës, Albin Kurti, ka bërë homazhe në nderim të 35-vjetorit të rënies së dëshmorëve Afrim Zhitia e Fahri Fazliu.

Nga aty, Kurti e Konjufca thanë se heronjtë do të kujtohen përherë, raporton EO.

“Saktësisht para 35 vjetëve, në lagjen Bregu i Diellit tek hyrja e tretë e bllokut të tretë ku lutftuan, Afrim Zhitia e Fahri Fazliu, deri sa ranë heroikisht për çlirimin e Kosovës dhe për debimin e forcave okupatore e armike serbe nga atdheu ynë. Afrimi edhe Fahriu ishin udhëheqës të Lëvizjes Popullore asokohe dhe pikërisht me ta udhëheqja e organizatës dhe udhëheqja e aktiviteteve bëhej nga brenda Kosovës e jo më prej jasht sikurse deri atëherë”, tha Konjufca.

Tutje, sipas tij, viti 1989 ka qenë vit i demonstrative dhe shumë të fuqishme, dhe shume të shpeshta gjithandej Kosovës.

“Një ditë para se të bien heroikisht kanë marrë pjesë në demonstratat e një nëntorit në vitin 1989 me ç’rast masës së demonstruesve i është drejtuar Afrim Zhitia. Në ato rrethana janë kalitur veprimtarët më të denjë luftëtarët më të pa epur dhe heronjët e popullit tonë që janë Afrim Zhitia, Fahri Fazliu dhe shumë e shumë të tjerë”, tha Kurti.“Liria e Kosovës erdhi sepse kishte çlirimtarë si Afrim Zhitia e Fahri Fazliu, porosia e tyre ishte e qartë “më mirë të vdiset me armë në dorë kundër Serbisë, kundër okupatorit se sa të jetojmë në robëri. Ata jo vetëm se ishin luftëtar e çlirimtar por ishin edhe intelektual të mëdhenjë, veprat e tyre shkrimet e tyre mendimi i tyre politik na frymëzon sot e kësaj dite”, tha Konjufca.