Ish-kreu i Organizatës së Veteranëve të Ushtrisë Çlirimtare të Kosovës (OVL-UÇK), Hysni Gucati, ka kritikuar Qeverinë Kurti për atë që ai e konsideron si një diferencim të padrejtë ndaj të burgosurve të ish-UÇK-së, duke përmendur vizitat e kryera në Hagë.

Gucati ka shprehur dëshpërim për faktin se nuk ka pasur një vizitë nga kryeministri Albin Kurti, por që zëvendësi i tij Besnik Bislimi vizitoi vetëm Rexhep Selimin dhe jo të tjerët në Hagë.

Sipas Gucatit, të vetmit zyrtarë që kanë qenë në vizitë me të gjithë janë kryetari i Parlamentit, Gluak Konjufca dhe ministrja e Drejtësisë, Albulena Haxhiu, ndërsa vizitat nga zyrtarët e tjerë kanë qenë vetëm për Rexhep Selimin.

“Shumë jam i dëshpëruar që nuk ishte, [një vizitë të kryeministrit në Hagë]. Çka është më e keqja zëvendëskryeministri vinte në vizitë tinëzare, që ne e kamë parë. Zv/kryeministri Besnik Bislimi ka qenë në vizitë të Rexha, edhe te ne nuk ka qenë kurrë, e ka vizituar vetëm atë. I vetmi njeri që ka qenë për të na vizituar neve ka qenë kryetari i parlamentit dhe ministrja e Drejtësisë Albulena Haxhiu. Liburn Aliu ka qenë që e ka vizituar vetëm Rexhën, kanë ardhur në Hage dhe e kanë vizituar vetëm atë”, ka deklaruar Gucati.

Ai ka theksuar ky veprim është turpi më i madh i kësaj qeverie.

“Shumë, diferencim kudo më të madh kur një Qeveri e jotja pavarësisht bindjes politike ne jemi qytetarë të këtij vendit, nuk duhet të jesh për dikë nënë për dikë njerkë. Ne kemi qenë të burgosur si pjesëtarë të UÇK-së jo si pjesëtarë të partisë politike. Ky ka qenë diferencim si në kohën e ish-Jugosllavisë kur i kanë difrencu njerëzit nga shkolla nga fakultete, kështu jam ndier si i diferencuar nga Qeveria. Kjo ka qenë turpi më i madh i kësaj qeverie”, ka theksuar ai.

Gucati ka potencuar se kanë biseduar me Selimin për këtë çështje, por ka shtuar se nuk i kanë bërë kurrë presion në lidhje me vizitat.

“Ne kurrë nuk i kemi thënë diçka, vetëm kemi thënë se kjo qeveri që bën diferencime nuk vyen asgjë”, ka deklaruar Gucati.

Kryetari i Partisë Demokratike të Kosovës (PDK), Memli Krasniqi, ka mbështetur kritikat e kryeministrit të Shqipërisë, Edi Rama, gjatë seancës së përbashkët parlamentare Kosovë – Shqipëri, për mos formimin e Komisionit që do të verifikonte standardet e punës së Gjykatës Speciale.

“Edi Rama nuk e ka tepruar, e kemi tepruar ne që s’kemi formuar Komisionin që mbikëqyr punën e Gjykatës Speciale. Si PDK kemi pasur kërkesa, diskutime e lutje, kemi qenë të hapur në çdo formë për miratimin e një rezolute, për krijimin e diçkaje që do të na arsyetonte funksionin e Dhomave të Specializuara, se fundja është miratuar nga Kuvendi i Kosovës. Nuk kemi shkuar më tutje vet si grup parlamentar, sepse s’kemi dashur që një çështje kaq e ndjeshme të shihet si politike apo përçarje mes partive”, tha Krasniqi në RTK.

Krasniqi për procedurat që kanë shoqëruar deri te certifikimi i Listës Serbe, ka thënë se partia e tij ka parë të nevojshme pritjen e rekomandimeve nga Ministria e Punëve të Brendshme dhe Ministria e Punëve të Jashtme.

Ndërkaq, sa i përket mundësisë së sulmeve në veri, Krasniqi ka kritikuar Kurtin për alarmime, në vend të punës së ngushtë me institucionet e sigurisë dhe jo thirrjeve publike.

Po ashtu, Krasniqi e ka kritikuar Qeverinë për subvencionet ndaj pensionistëve dhe fëmijëve, duke e cilësuar si akt që shpërfaq paaftësinë për implementim të buxhetit.

Ai ka thënë se thirrja e fundit e ministrit të Financave, Hekuran Murati, për rikthim të mjeteve prej 100 eurove për këdo që s’është i kënaqur me vendimin, është tallje me qytetarët.

“Këto janë subvencione që në esencë tregojnë paaftësinë e Qeverisë të implementojë buxhetin, e që pastaj ngarendin që t’i shpenzojnë mjetet që s’dinë t’i dërgojnë në investime kapitale. Buxhetet e viteve të fundit kanë qenë jo efikase në shpenzime. Çdo ndihmë ndaj qytetarëve të varfëruar është e mirëseardhur, por s’është zgjidhje”, ka thënë Krasniqi.

Krasniqi e ka quajtur të pashpjegueshme reduktimin e energjisë elektrike në kohën e rritjes së faturave tash e dy vjet.

“E para çmimet investive për kapacitete të reja gjeneruese në energji të ripërtërishme në mënyrë të veçantë,  sidomos te solare dhe me erë, kanë rënë dukshëm. E dyta ka pasur aq shumë kërkesa dhe interesim nga investitorët e huaj e vendor si asnjëherë më parë, asnjë nga ta s’është lejuar të shkojnë më tutje”, tha ai.