Ministri i Financave, Hekuran Murati, në një konferencë për media pas mbledhjes së qeverisë, ka thënë se deri tani si ministri kanë pranuar rreth 60 aplikime që të heqin dorë nga shtesat prej 100 eurove që qeveria ka ndarë për fundvit.

Ai ka thënë se sot, përveç që do të dalin paga për punonjësit shtetëror do të ekzekutohen edhe shtesat e njëhershme në vlerë prej 100 euro për fëmijët 0-16 vjeç dhe pension marrësit. “Kemi bërë përgatitje edhe mjetet janë ndarë. Dhe jemi duke bërë përgatitje që të provojmë që gjatë ditës sot të bëjmë edhe ekzekutimin e shtesave. Përveç pagave që do të ekzekutohen sot për punonjësit publik dhe shtesat do të dalin. Ne si ministri po bëjmë të pa mundurën që ta përmbyllim vitin suksesshëm”, tha Murati.

Po ashtu, ai njoftoi se për të mos marrë këto mjete përmes formularit kanë bërë kërkesë rreth 60 persona.

“Sa i përket formularit që kemi prezantuar ka qenë si rrjedhojë e kërkesave që kanë qenë. Kemi dashur që të ofrojmë mundësin që dikush që nuk dëshiron t’i marr të ketë mundësinë të refuzoj. Me sa kam informatë kanë qenë 60 aplikime të pranuara. Bëhet fjalë për një numër të vogël minimal”, tha ai.

Ditëve të fundit Kosova është përballur me probleme të furnizimit me energji elektrike, për shkak të mbingarkesës në rrjetit.

Ministrja e Ekonomisë, Artane Rizvanolli, sot është takuar me përfaqësues të Operatorit të Sistemit, Transmisionit dhe Tregut (KOSTT) dhe të Kompanisë Kosovare për Distribuim të Energjisë Elektrike (KEDS).

E pyetur se, a është strategji e gabuar subvencionimi i klimave e pompave termike, pasi nga inxhinierë të kësaj fushe thonë se janë pikërisht ato që rrisin konsumin e energjisë?, ajo ka thënë se, kjo është një prej atyre gjerave që ka pas keqinformim.

“Kjo është një prej atyre gjerave që ka pas keqinformim, nuk po them prej mediave, por në informim publik. Sigurisht që kur janë dizajnuar skemat e subvencionimit është menduar çdo detaj, prandaj edhe ka qenë kushti që nuk mund të përfitoni nga pajisjet ngrohëse eficente që ngrohin me energji elektrike përveç nëse jeni konsumator i cili është duke u ngrohur me energji elektrike me kalldaj, me pajisje jo efiçiente dhe nuk keni asnjë opsion tjetër. Nëse i shini kriteret e skemës këto kanë qenë kriteret e skemës. Nga të dhënat reale që i kemi nga konsumi i konsumatorëve që kanë përfituar shihet se në dimrin 2022-2023 në krahasim me vitin paraprak 2021-2022 përfituesit kanë konsumuar 19 për qind me pak mesatarisht. Përfituesit e klimave me specifikisht 24 për qind me pak mesatarisht se sa në vitet paraprake”, tha ajo.

E, përfaqësuesi i KOSTT-it, Evetar Zeqiri, ka theksuar se KESCO, si institucion përgjegjës për furnizimin e energjisë së munguar, është duke importuar energjinë e nevojshme, ndërsa KOSTT-i po shfrytëzon të gjitha kapacitetet balancuese në bashkëpunim me Shqipërinë.

“Ndërtimi i nënstacionit në Fushë Kosovë tashmë është finalizuar, duke zgjidhur problemet e furnizimit në zonat e Fushë Kosovës dhe Obiliqit. Për nënstacionin në Ferizaj, projekti është në fazën e fundit të punimeve dhe shpresohet të përfundojë deri në fund të këtij viti”.

Ndryshe, ministria e Ekonomisë dhe KOSTT, kanë ftuar qytetarët e Kosovës për kursim të energjisë elektrike, pasi ngarkesa ka arritur nivele rekord.