Në seancën e së enjtes, në Gjykatën Themelore në Prishtinë, janë dhënë fjalët përfundimtare në rastin “Subvencionet 1”.

Në fjalët përfundimtare, Prokuroria ka konsideruar që ka prova të mjaftueshme që e dëshmojnë fajësinë e të pandehurve, ndërsa ne anën tjetër, mbrojtja ka konsideruar se të akuzuarit janë të pafajshëm dhe duhet të lirohen nga veprat që iu vihen në barrë.

Prokurori special Rafet Halimi, gjatë elaborimit te fjalës përfundimtare ka deklaruar se mbrojtja nuk ka paraqitur asnjë provë me anë të së cilave do të kundërshtonte ndonjë pretendim të prokurorisë.

I njëjti poashtu i ka numëruar gjykatës rrethanat rënduese dhe lehtësuese për të akuzuarit për sa i përket matjes së dënimit.

Betim Shala, avokat i të akuzuarit Jeton Sylaj, ka thënë se sipas prokurori në fjalën përfundimtare nuk e ka përmendur asnjë rrethanë që e ngarkon të mbrojturin e tij.

“Marrëveshja për shërbime të veçanta është kontratë që rregullohet me ligjin për marrëdhëniet detyrimore kështu që pozita e Jeton Sylës nuk është zyrtar publik dhe nuk ka mundësi ta kryen këtë vepër penale për të cilën është akuzuar”, tha mes tjerash Shala.

Tutje, avokati Bekim Kafexholli mbrojtës i të akuzuarit Almir Abdurrahmani ka deklaruar se Prokuroria ende nuk e ka të qartë pjesën e të mbrojturit të tij dhe rolin që ai ka pasur në këtë çështje që e njëjta e ka ngarkuar.

Fjalën përfundimtare të avokatit të tij e ka mbështetur i akuzuari Almir Abdurrahmani, ndërkaq ka shtuar se ngritja e aktakuzës ndaj tij ka qenë e padrejtë dhe e drejtuar gabimisht.

‘Është thelbësore të theksoj se asnjëherë nuk kam përfituar në mënyrë të kundërligjshme, asnjë cent të vetëm”, tha mes tjerash Abdurrahmani.

Avokati Fanol Krasniqi, në fjalën e tij theksoi se Prokuroria nuk e ka arsyetuar dashjen e të mbrojturit të tij Afrim Abazaj në asnjë formë.

‘Në rastin konkret konsideroj se në veprimet e Afrimit nuk ka vepër penale’, tha ndër të tjera Krasniqi.

Poashtu, fjalën përfundimtare e ka elaboruar edhe avokati Naim Rudari. I njëjti për të mbrojturin e tij Luan Statovci ka thënë se duhet përfundimisht të lirohet nga akuza, duke shprehur besim në profesionalizmin e trupit gjykues.

“Për ta fajësuar Luan Statovcin u bënë shumë përpjekje, gjithherë me prova të kundërligjshme, edhe pse ato akoma nuk i ka shpallë Gjykata të kundërligjshme ne jemi thellësisht të bindur se ato do të shpallen të kundërligjshme, kryesisht masat e fshehta”, tha tutje Rudari.

Në anën tjetër, i mbrojturi i tij përveç që është pajtuar me fjalët e Rudarit, ka shtuar se në Ministrinë e Bujqësisë ka punuar për 15 vite dhe se këtë punë e ka kryer me nder dhe përkushtim.

Avokati Skender Musa ka mbështetur kolegët e tij avokat duke u shprehur se pajtohet se provat nga masat e fshehta janë marrë në mënyrë të kundërligjshme dhe ka theksuar në bazë të pozitës të të mbrojturit të tij Sadat Shkodra, i njëjti nuk ka mundur ta keqpërdorë pozitën zyrtare.

Arianit Koci, mbrojtës i të akuzuarit Hasan Maxharraj ka deklaruar se Prokuroria ka sjellë prova të kundërligjshme dhe që disa nga dëshmitarë sipas tij kanë qenë fyerje e inteligjencës për gjykatën.

Fjalën e Kocit e ka përkrahur edhe Maxharraj dhe ka deklaruar se punën e tij gjithmonë e ka punuar me ndërgjegje të pastër.

Poashtu, edhe avokati Tahir Rrecaj, mbrojtës i të akuzuarit Salih Statovci ka vlerësuar se prokuroria e ka mbështetur akuzën e saj në prova të papranueshme.

Tutje, avokati Granit Vokshi pas dorëzimit me shkrim të fjalës përfundimtare dhe elaborimit të së njëjtës ka deklaruar se Kushtrim Zogaj nuk e ka pasur idenë qe ato toka kane qenë të Istogut, dhe se të njëjtën gjë e ka kuptuar pas një viti, pra që një pjesë që është mbjellur nga Selman Balaj ishte pjesë e Komunës së Istogut.

I akuzuari Zogaj, mbështeti fjalën e avokatit dhe tij duke i pohuar gjykatës se asnjëherë askujt nuk ka marrë dhe nuk do marrë ryshfet.

Avokati Argjend Sefa, mbrojtës i të akuzuarit Musa Nivokazi fjalën përfundimtare e ka dorëzuar me shkrim.

Njëjte kanë vepruar edhe avokati Feim Alaj, për të mbrojturin e tij Berat Nika, avokati Xhemajl Ademaj për të mbrojturin e tij Lulzim Hajdaraj, dhe avokatja Vjosë Beqiri për të mbrojturin e saj Florim Nimanaj.

Në shkurt të 2022-ës, PSRK kishte ngritur aktakuzë ndaj 21 të pandehurve, në rastin “Subvencionet 1”, të cilët janë: Luan Statovci, Sadat Shkodra, Salih Statovci, Berat Nika, Hasan Maxharraj, Kushtrim Zogaj, Habibe Dauti, Alban Bushati, Jeton Sylaj, Lulzim Hajdaraj, Musa Nivokazi, Almir Abdurrahmani, Salih Kelmendi, Bekim Shala, Fuat Morina, Dukagjin Mavraj, Flamur Zeqiri, Daut Kabashi, Kastriot Berisha, Afrim Abazaj dhe Florim Nimanaj.

Ndryshe, në seancën e 21 shkurtit 2023, trupi gjykues kishte veçuar procedurën për të akuzuarit Nivokazi dhe Kelmendi, duke shtuar se gjykata në seancës e radhës do të vlerësojë nëse procedura do të vazhdohet ndaras apo do të bashkohet.

Ndërkaq, në seancën e 14 prillit 2023, ishte bashkuar procedura penale ndaj të akuzuarit Nivokazi me të akuzuarit e tjerë.

Në seancën e 13 prillit 2022, Gjykata Themelore në Prishtinë, kishte pranuar marrëveshjen për pranimin e fajësisë për 7 nga 21 të akuzuarit në rastin “Subvencionet 1”.

Ndërsa, më 19 prill 2022 Gjykata Themelore në Prishtinë kishte shpallur aktgjykim dënues ndaj shtatë të akuzuarve në rastin “Subvencionet 1”, Alban Bushati, Kastriot Berisha, Bekim Shala, Flamur Zeqiri, Habibe Dauti, Dukagjin Mavraj dhe Daut Kabashi, duke i dënuar me 6 vite e 1 muaj burgim dhe 2 mijë euro gjobë.

Sipas aktakuzës së ndryshuar të PSRK-së, të 4 prillit 2022, Flamur Zeqiri, Bekim Shala, Kastriot Berisha dhe Dukagjin Mavraj, akuzoheshin për veprën penale mashtrim me subvencione, për keqpërdorim të pozitës apo autoritetit zyrtar akuzohej Habibe Dauti, për marrje ryshfeti dhe falsifikim të dokumenteve akuzohej Alban Bushati, ndërsa për dhënie ryshfeti akuzohej Daut Kabashi.

Aktakuza e ndryshuar më 4 prill 2022 nga Prokuroria Speciale e Republikës së Kosovës, ngarkon Luan Statovcin, Sadat Shkodrën, Salih Statovcin, Berat Nikën, Hasan Maxharrajn, Kushtrim Zogajn, Jeton Sylajn, Lulzim Hajdarajn, Musa Nivokazin, Almir Abdurrahmanin, Salih Kelmendin, Fuat Morinën, Afrim Abazajn dhe Florim Nimanajn me veprat penale “Marrje ryshfeti”, “Keqpërdorim i detyrës apo autoritetit zyrtar”, “Mashtrim me subvencione”, e të tjera. /BetimipërDrejtësi