Ministrja e Ekonomisë Artane Rizvanolli, ka vizituar kanalin e Ibër-Lepencit në Zubin Potok, pas sulmit që iu bë të premten në mbrëmje.

Ajo tha se atje aktualisht rrjedhja e ujit është me një një kapacitet prej 3 mijë litra në sekondë, siç thekson ajo kjo është e mjaftueshme për të furnizuar poçet e KEK-ut për ftohje, ndërsa shtoi se shpresojnë që furnizimi me ujë të kthehet së shpejti në së paku disa prej komunave.

“Vizituam edhe kanalin e Ibër-Lepencit në Zubin Potok, në vendin e ngjarjes ku ka ndodhur sulmi terrorist i mbrëmshëm, aty pamë se zgjidhja që është ofruar nga inxhinierët e  Ibër-Lepencit dhe kontraktorit është duke funksionuar. Aktualisht rrjedha e ujit është me një kapacitet prej 3 mijë litra në sekondë, që është e mjaftueshme për të furnizuar poçet e KEK-ut për ftohje, mirëpo shpresojmë që së shpejti do të mund të fillojë edhe furnizimi me ujë në së paku disa prej komunave”, deklaroi Rizvanolli nga Mitrovica.

Shefja e dikasterit të Ekonomisë, njoftoi se ka vizituar edhe autobotët në rajonin e Mitrovicës.

“Përgjatë kësaj dite vizituam edhe autobotët në rajonin e Mitrovicës, për të siguruar ujë për qytetarët deri në zgjidhjen përfundimtare të problemit. Kompanitë Rajonele të Ujësjellësit, Agjencia për Menaxhimin e Emergjencave, dhe Korporata Energjetike e Kosovës kanë vendosur autobotë në pikat si vijim: në Mitrovicën e Veriut në lagjen e Boshnjakëve, dhe gjithashtu në tri lokacione në Mitrovicën e Jugut duke përfshirë këtu edhe në shesh. Në Zveçan është vendosur një autobotë afër Kuvendit Komunal, ndërsa gjithashtu edhe në Drenas, Skenderaj, dhe Fushë Kosovë”, u shpreh ajo.

Rizvanolli tha se do të vazhdojnë të vëzhgojnë situatën me kujdes, në veçanti atë të furnizimit të KEK-ut me ujë të mjaftueshëm për ftohje të termocentralit Kosova B.

“Ne do të vazhdojmë ta vëzhgojmë situatën me kujdes, veçanarisht rreth furnizmit të KEK-ut me ujë të mjaftueshëm për ftohje të termocentralit Kosova B. Gjithashtu edhe për furnizimin me ujë nga ana e Kompanive Rajonale dhe institucioneve tjera”, deklaroi ministrja.

Nga mungesa e ujit të pijes pas sulmit në kanalin Ibër-Lepenc, një cisternë është vendosur edhe tek Kalaja e qytetit në Vushtrri, në mënyrë që qytetarët të furnizohen me ujë të pijes.

“Te Kalaja e qytetit të Vushtrrisë, Kompania Regjionale e Ujësjellësit “Mitrovica”, njësia në Vushtrri, ka vendosur një cisternë me ujë të pijes përmes së cilës mund të furnizohen qytetarët”, thuhet në njoftim.

Në terren gjendet edhe kryetari i Vushtrrisë, Ferit Idrizi, i cili ka vizituar cisternën nga e cila po furnizoheshin qytetarët vushtrrias.

Idrizi ka thënë se është në komunikim të vazhdueshëm me institucionet relevante pas sulmit të mbrëmshëm tek kanali Ibër- Lepenc në Varagë të Zubin Potokut.

Ish-shefi i KRU Prishtinës, Sokol Xhafa, ka thënë se uji nga kanali i Ibër-Lepencit nuk ka qenë asnjëherë për pije.

Ai bëri thirrje që të mos bëhet panik për këtë çështje.

“Në kontekstin e sulmit të mbrëmshëm në infrastrukturën kritike, në kanalin e Ibrit, një gjë nuk arrij ta kuptojë. Si ka mundësi që në këtë vorbullën e turbullt të deklarimeve në media, del Ministria e Shëndetësisë dhe deklaron, po citoj nga lajmet në KTV “Uji nga kanali është i pa pijshëm”. Të nderuar përderisa flasim për ujë nga kanali, ai asnjëherë nuk qenë për pije, sepse është i pa trajtuar. I njëjti trajtohet paraprakisht në Impiante të Trajtimit të Ujit, pastaj shpërndahet për pije. Si person i çertifikuar për menaxhimin e krizave, emergjencave në sektorin e ujit, më e pakta që institucionet duhet bërë, është të mos hedhin panikë, por të kujdesen për qytetarët. Ndërsa Qeveria duhet të vetëdijësohet se ekspertët nuk krijohen brenda natës, por ata që janë edukuar e ngritur duke sfiduar çdo sistem, duhet mbajtë afër e të përkrahen! Deri atëherë miq, mos shpërndani panikë, kujdesuni për veten dhe Familjen, ruajeni ujin, duajeni shtetin!”, tha Xhafa.