Instituti “Musine Kokalari” në një komunikatë për media shkruan se Kosova qëndron nën mesataren e rajonit sa i përket të drejtave të punëtorëve.

Sipas njoftimit, Kosova vazhdon të renditet nën mesataren e rajonit për nga të drejtat e punëtorëve, me pjesëmarrjen më të ulët në tregun e punës (38.6% punësim dhe 43.2% aktivitet).

“Në krahasim, Shqipëria, Mali i Zi dhe Serbia shënojnë treg më aktiv dhe nivele më të larta punësimi, ndërsa vendet e tjera të rajonit mbeten nën 50% të aktivitetit”, thuhet në njoftim.

Të dhënat u prezantuan në Fakultetin Ekonomik të Universitetit të Prishtinës nga  Instituti për Politika Sociale Musine Kokalari, në kuadër të raportit krahasues 2024 -2025 mbi cilësinë e të drejtave të punëtorëve në Ballkanin Perëndimor.

Raporti evidenton se shumica e vendeve të rajonit përballen me paga të ulëta, orare të  zgjatura pune, mbrojtje të pamjaftueshme në vendin e punës dhe dialog social të  dobët.

Drejtori i këtij instituti, Visa Ymeri, ka thënë se Kosova qëndron më së keqi në rajon edhe për pagën minimale.

“Kosova ka gjithashtu pagën minimale më të ulët në rajon, 342 euro, e cila nuk  mbulon as gjysmën e kostos reale të jetesës. “Këta tregues tregojnë se puna në  Kosovë nuk garanton një standard minimal jetese dhe se politikat aktuale nuk po i mbrojnë mjaftueshëm punëtorët”, tha Visar Ymeri, drejtor ekzekutiv i Institutit për  Politika Sociale Musine Kokalari.

“Raporti vë në pah edhe shkeljet e orarit ligjor të punës, mungesën e kapaciteteve inspektuese dhe një hendek të thellë gjinor, me pjesëmarrje të grave në tregun e  punës prej vetëm 34.7% dhe diferencë pagash prej 18.6%. Instituti u bën thirrje institucioneve, sindikatave dhe punëdhënësve që të rrisin standardet e punës dinjitoze në Kosovë dhe në mbarë rajonin”, përfundon komunikata.

Një aksident i rëndë trafiku ka ndodhur mëngjesin e sotëm në autostradën “Ibrahim Rugova”, në drejtimin Prizren-Suharekë ku për pasojë humbi jetën një grua që po drejtonte një veturë me targa të huaja pas përplasjes me një kamion me targa vendore që po transportonte mallra.

Policia e Kosovës deri tani ka konfirmuar vdekjen e vetëm një personi, por në media u raportua edhe për një viktimë të dytë dhe se të dyja gratë që humbën jetën tragjikisht ishin nga Shqipëria.

Mediumi “Sinjali” raportoi se si pasojë e përplasjes së fuqishme, drejtuesja e veturës, Elizabet Katija, 43 vjeçare, ka humbur jetën në vendin e ngjarjes, vdekje e cila është konstatuar nga ekipi mjekësor emergjent.

Fillimisht e lënduar rëndë, pasagjerja në veturë, Eorda Sinollari, 32 vjeçare, ka ndërruar jetë më pas nga plagët e rënda. Ajo ishte dërguar në Emergjencën e Spitalit Rajonal në Prizren.

Në aksident është lënduar edhe drejtuesi i kamionit, Munish Grajçefci, i cili ka pranuar trajtim mjekësor.

Mjetet e përfshira në aksident janë një veturë Mercedes GLE, me targa AB, e drejtuar nga Elizabet Katija (viktimë), dhe një kamion Mercedes Atego, i drejtuar nga Munish Grajçefci (i lënduar).

Ushtarë amerikanë nga Komanda Rajonale-Lindje e KFOR-it, zhvilluan së fundmi trajnim të specializuar për të përmirësuar aftësinë e tyre në zbulimin, gjurmimin dhe neutralizimin e dronëve – një aftësi gjithnjë e më kritike në mjedisin e sotëm të sigurisë, ka njoftuar KFOR-i.

Misioni i NATO-s tha se sistemi ndërpret frekuencën e kontrollit të dronit, duke e detyruar atë të kthehet tek operatori, si dhe mund gjithashtu të ndërhyjë në sinjalet GPS/GNSS, duke bërë që droni të rrijë pezull, të ulet ose të rrëzohet.

“Stërvitje të tilla forcojnë aftësitë teknike, duke theksuar njëkohësisht koordinimin, punën ekipore dhe përshtatshmërinë në reagimin ndaj kërcënimeve ajrore që po evoluojnë vazhdimisht”, tha KFOR-i.

KFOR-i i zotëron këto aftësi dhe i ka përdorur tashmë ato në skenarë operacionalë, duke rritur efektivitetin e misionit në adresimin e sfidave të reja të sigurisë, shtoi misioni.

KFOR-i përsëriti se vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit që jetojnë në Kosovë dhe lirinë e lëvizjes, në çdo kohë dhe në mënyrë të paanshme. KFOR-i punon në koordinim të ngushtë me Policinë e Kosovës dhe Misionin e Sundimit të Ligjit të Bashkimit Europian në Kosovë (EULEX), në rolet e tyre përkatëse si reagues të sigurisë.

Kryetari i PDK-së dhe kandidati për kryeministër, Bedri Hamza, e ka pritur sot në zyrën e kryetarit të Mitrovicës së Jugut, kryetarin e ri të Komunës, Faton Pecin.

Hamza e ka pritur në mënyrë mjaft miqësorë bashkëvendësin e tij për t’ia dorëzuar pozitën e kryetarit të komunës, duke i uruar punë të mbarë.

Ish-kryetari i Komunës së Mitrovicës së Jugut ka thënë se tashmë gara politike ka përfunduar dhe se duhet koncentrim për të mirën e qytetit.

“Gara politike ka përfunduar dhe tash të gjithë duhet ta koncentrojmë energjinë në dobi të qytetit. Edhe një herë urime dhe ju priftë e mbara dhe na priftë e mbara”, ka thënë Hamza.

Kryetari i ri Faton Peci e ka falënderuar Hamzën për secilën punë të mirë që ka bërë për qytetin e Mitrovicës së Jugut.