Komandanti i KFOR-it, gjeneralmajor Ozkan Ulutash, ka mbledhur në një takim përfaqësues diplomatikë në vend në selinë e KFOR-it në Kampin Film City, në Prishtinë.

Ulutash u takua me ambasadorët e Gjermanisë, Italisë dhe Mbretërisë së Bashkuar, Zëvendëskreun e Misionit të Francës në Kosovë dhe një përfaqësuese të ambasadës së SHBA-së nga QUINT, si dhe Përfaqësuesin e Posaçëm të BE-së dhe Zëvendëskreun e Misionit të Turqisë, sipas një njoftimi të KFOR.

“Takimi ofroi një mundësi të vlefshme që Komandanti të paraqiste situatën e sigurisë në rajon, duke theksuar angazhimin e KFOR-it për të ruajtur një mjedis të sigurt për të gjithë njerëzit në Kosovë. Në këtë kontekst, Gjenerali Ulutash vlerësoi kontributet afatgjata të të gjitha vendeve në misionin e udhëhequr nga NATO, KFOR”, u tha në njoftim.

KFOR përsëriti se vazhdon të zbatojë mandatin e tij – të bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit që jetojnë në Kosovë dhe për të garantuar lirinë e lëvizjes, në çdo kohë dhe në mënyrë të paanshme. KFOR punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në rolet e tyre përkatëse si përgjegjës të sigurisë.

Kryetari i Komunës së Prishtinës, Përparim Rama, po qëndron për një vizitë në SHBA.

Rama është pritur nga kryetari i State Island, Vito Fossella, në një takim që sipas kreut të Prishtinës është konfirmim i rëndësisë që partnerët amerikanë i kushtojnë raportit me Prishtinën dhe Kosovën.

“Partneriteti ynë me Staten Island është më shumë se simbolik është strategjik. Prandaj, diskutuam për praktikat e mira amerikane që mund të përkthehen në projekte të prekshme për qytetarët tanë”, ka shkruar mes tjerash Rama.

Postimi i plotë:

Pata nderin të pritem nga Kryetari Vito Fossella në zyrën e tij në Staten Island 🇺🇸 Kjo pritje nuk ishte vetëm një takim miqësor, por një konfirmim i qartë i rëndësisë që partnerët tanë amerikanë i kushtojnë marrëdhënieve me Prishtinën dhe Kosovën.🇽🇰 🇺🇸

Në emër të qytetarëve të Prishtinës, i dhurova Hyjneshën në Fron dhe revistën Prishtina Art, si simbol i kulturës sonë dhe i miqësisë që na bashkon.

Partneriteti ynë me Staten Island është më shumë se simbolik është strategjik. Prandaj, diskutuam për praktikat e mira amerikane që mund të përkthehen në projekte të prekshme për qytetarët tanë.

Pritja e ngrohtë dhe respekti institucional i treguar nga Mayor Fossella është dëshmi e miqësisë së thellë mes Prishtinës dhe qyteteve amerikane. Kjo miqësi mbetet një prej aleancave më të rëndësishme për të ardhmen tonë. 🇺🇸 🤝 🇽🇰

Instituti Hidrometeorologjik i Kosovës (IHMK) njofton se gjatë vikendit vendi ynë do të karakterizohet nga mot kryesisht i vranët, me mundësi për reshje të lehta shiu në disa zona.

Sot pritet të mbajë mot me vranësira të dendura dhe reshje të izoluara shiu, ndërsa temperaturat minimale do të jenë ndërmjet 3 dhe 5 gradë Celsius, e maksimalet nga 6 deri në 9 gradë Celsius. Do të fryjë erë nga veriperëndimi me shpejtësi 1 deri në 6 metra për sekondë.

Të dielën parashikohet të mbajë mot i vranët me riga lokale shiu, temperaturat minimale do të lëvizin ndërmjet 1 dhe 3 gradë Celsius, ndërsa ato maksimale parashihen të jenë nga 5 deri në 9 gradë Celsius. Erërat do të fryjnë nga verilindja me shpejtësi prej 1 deri në 5 metra për sekondë.