Kryetari i Drenasit, Ramiz Lladrovci, i ka bërë thirrje PDK-së që të hapet për profile të reja në parti.

Përmes një postimi në Facebook, ai tha se partia do të bëhej më e fortë me profilet e Sylejman Selimit, Fatmir Limajt, Rrustem Mustafës, Atifete Jahjagës, Buna Mustafës, Kolë Berishës, apo përfshirja e vajzave të Profesor Çettës, Agatës dhe Donikës, si dhe personaliteteve tjera për zgjedhjet që na presin.

“Hapja e PDK-së ndaj personaliteteve të pa përfshira në rrjedha politike, është e domosdoshme në këtë kohë vendimtare për kthesën e fortë që i duhet vendit, për të arritur fitore më 28 dhjetor. Kosova ka nevojë për ndryshim të kursit, menjëherë”, deklaroi Lladrovci.

Ai tha se skena politike ka nevojë për kompetencë, përkushtim dhe besim, me burime njerëzore për shtet dhe përfaqësim të duhur.

Lladrovci pati kritika për Degën e PDK-së në Prishtinë, e cila tha se para dy dekadave kishte dhjetëra profesorë e doktorë shkencash, “të cilët sot i mungojnë PDK-së dhe Parlamentit”.

“Kosovës i duhet qartësim i rrugës dhe vlerave mbi të cilat u ndërtua. Me vullnet e përkushtim, arrihet fitorja”, u shpreh Lladrovci.

Ambasadori i Francës në Kosovë, Olivier Guerot, ka njoftuar se ka zhvilluar një takim me presidenten Vjosa Osmani, ku është diskutuar për situatën politike në vend dhe procesin zgjedhor të 28 dhjetorit.

Në një postim në rrjetet sociale, Guerot ka theksuar rëndësinë që të gjitha partitë politike të kenë mundësi të marrin pjesë në zgjedhjet e ardhshme, në mënyrë që procesi të jetë plotësisht gjithëpërfshirës.

Ai ka nënvizuar gjithashtu se “roli i mediave të lira është thelbësor në një demokraci funksionale”.

“Gazetarët duhet të respektohen dhe, nëse është e nevojshme, të mbrohen”, theksoi Guerot.

Ambasadori francez ka përsëritur shpresën e Francës që zgjedhjet e 28 dhjetorit të çojnë drejt formimit të një qeverie të re, duke thënë se vendit të tij “i nevojitet një partner i plotë për të kontribuar në stabilitetin rajonal dhe forcimin e marrëdhënieve tona dypalëshe”.

Guerot ka bërë të ditur se e ka informuar presidenten Osmani për gatishmërinë e Francës për të mbështetur tranzicionin energjetik në Kosovë, përgatitjet për Lojërat Mesdhetare 2030, përpjekjet e Kosovës për t’u bërë anëtare e plotë e Organizatës Ndërkombëtare të Frankofonisë, dhe zhvillimin e shkëmbimeve ekonomike mes dy vendeve.

Ambasadori i ri i Gjermanisë, Rainer Rudolph, ka vizituar Mitrovicën e Veriut, duke takuar personalitete dhe parë vende të ndryshme atje.

“Këtë javë, Ambasadori ynë kaloi një ditë të tërë në Mitrovicën e Veriut, duke u takuar me përfaqësues të shoqërisë civile, kulturës dhe shtypit. Duke filluar me një tryezë të rrumbullakët me përfaqësues të shoqërisë civile dhe medias, Rainer Rudolph mësoi rreth sfidave politike dhe shoqërore me të cilat përballet Komuniteti”, njofton ambasada.

Ambasadori është njoftuar edhe me skenën kulturore duke qenë në Qendrën Acquarius dhe Shkollën Rock të Mitrovica.

“Ne e mbështesim Kosovën si një shtet shumëetnik dhe mezi presim të vazhdojmë bisedën”, njofton tutje ambasada.

Kryetari i Lidhjes Demokratike të Kosovës (LDK), Lumir Abdixhiku, ka pritur sot në takim ambasadorin e Francës në Kosovë, Olivier Guérot.

LDK në njoftim tha se gjatë takimit u diskutua mbi zhvillimet e fundit politike në vend dhe qëndrimet e Lidhjes Demokratike të Kosovës karshi këtyre proceseve, me theks të veçantë në zgjedhjet e 28 dhjetorit.

Kjo parti tha se Abdixhiku e njoftoi ambasadorin Guérot për “përgatitjet e intensifikuara” të LDK-së për zgjedhjet nacionale, duke theksuar mobilizimin e plotë të strukturave në nivel vendi.

Ai tha po ashtu se LDK është në fazën përfundimtare të përgatitjeve për zgjedhjet nacionale, duke finalizuar listën për deputetë me “figura të dëshmuara profesionale, të reja e integruese, të cilat vijnë me vizion të qartë për zhvillimin ekonomik, forcimin e shtetit të së drejtës dhe modernizimin e vendit”.

Abdixhiku potencoi se LDK “po paraqet para qytetarëve një ekip të përgjegjshëm dhe të përkushtuar, që reflekton seriozitet, punë dhe përvojë; pra një listë që synon t’i japë vendit institucione stabile dhe një qeverisje zhvillimore, në shërbim të qytetarëve”.

LDK tha se Abdixhiku shprehu mirënjohjen e tij për mbështetjen e vazhdueshme që Franca i ka dhënë Kosovës në të gjitha proceset shtetformuese dhe zhvillimore.

Ai nënvizoi se mbështetja franceze mbetet thelbësore për avancimin e aspiratave të Kosovës drejt zhvillimit, stabilitetit dhe integrimit të plotë europian.

Kryetari i ri i Mitrovicës së Veriut, Milan Radojevic, para pak minutash është betuar si kryetari i ri i kësaj komune.

Ai është nënshkruar në seancën inauguruese në dokumentacionet që kanë pasur simbolet e Republikës së Kosovës.

Radojevic ka deklaruar se do të punojë për interesin e qytetit të Mitrovicës së Veriut.

Gjithashtu edhe në sallën e Kuvendit Komunal janë parë simbolet e Republikës së Kosovës.

Betohet edhe kryetari i ri i Graçanicës, Novak Zhiviq

Asamblistët e Kuvendit Komunal të Graçanicës dhanë betimin sot në një seancë ceremoniale dhe morën detyrën në Kuvendin Komunal për katër vitet e ardhshme. Kryetari i sapozgjedhur i Graçanicës nga Lista Srpska, Novak Zhiviq, gjithashtu dha betimin.

Thirrja e re e Kuvendit Komunal të Graçanicës përbëhet nga 19 asamblistë – 13 nga Lista Srpska, katër nga Aleanca për Shqiptarët dhe dy deputetë nga partia Për Liri, Drejtësi dhe Mbijetesë.

“Deklaroj solemnisht se do t’i kryej detyrat e mia dhe do t’i përdor kompetencat e mia si asamblist i Kuvendit Komunal të Graçanicës, me nder, besnikëri, paanshmëri, ndërgjegje dhe sipas ligjit, me qëllim që të mundësoj krijimin e kushteve për një jetë paqësore për të gjithë qytetarët”, thuhet në betim të dhënë nga asamblistët.

Novak Zhiviq merr detyrën e Kryetarit të Komunës së Graçanicës nga Ljiljana Zhubariq, e cila ka qenë në krye të komunës për katër vitet e fundit.

Betohet kryetari i ri i Zubin Potokut, Millosh Peroviq