Këshilli për Marrëdhënie Shqiptaro-Amerikane me seli në Uashington po ndjek me vëmendje zhvillimet politike në Kosovë dhe mbetet fuqimisht i përkushtuar për të mbështetur çdo përpjekje që forcon institucionet demokratike të vendit dhe pozitën ndërkombëtare të Republikës së Kosovës — veçanërisht partneritetin e saj të qëndrueshëm me Shtetet e Bashkuara të Amerikës.

Në një deklaratë të publikuar sot, Këshilli shpreh shqetësimin e thellë për bllokimin politik të vazhdueshëm dhe dështimin për konstituimin e Kuvendit sipas vullnetit të qytetarëve.

“Kjo paralizë institucionale është e pajustifikueshme. Ajo minon besimin publik, dobëson shtetin dhe e lë Kosovën të ekspozuar në një ambient global gjithnjë e më të paqëndrueshëm”, thuhet në deklaratë.

Këshilli përshëndet vendimin e Gjykatës Kushtetuese dhe vlerëson vullnetin e aktorëve politikë për ta pranuar atë si rrugëdalje legjitime.

“Kosova ka një traditë krenare të respektimit të shtetit ligjor dhe autoritetit kushtetues — ky moment kërkon të njëjtën përkushtim”.

Me këtë rast, Këshilli i bën thirrje të gjitha partitë parlamentare që të shkojnë në seancën e radhës me ndjenjën e urgjencës dhe unitetit, dhe të arrijnë marrëveshje për zgjedhjen e Kryetarit të Kuvendit dhe formimin e qeverisë pa vonesa. “Vendi duhet të ecë përpara,” është mesazhi i prerë.

“Mbështetja e Shteteve të Bashkuara është thelbësore — por ajo kërkon qeverisje efektive dhe koordinim të vazhdueshëm. Institucionet e Kosovës duhet të tregojnë pjekuri dhe qartësi në këtë moment vendimtar”.

Në fund, Këshilli për Marrëdhënie Shqiptaro-Amerikane rikonfirmon përkushtimin e tij për të shërbyer si një urë lidhëse mes Kosovës dhe SHBA-ve, dhe për të amplifikuar zërin e popullit dhe institucioneve të Republikës së Kosovës.

Instituti Hidrometeorologjik i Kosovës (IHMK) njofton se të shtunën parashihet të mbajë mot me diell dhe vranësira të lehta.

“Temperaturat minimale do të lëvizin ndërmjet 12-18 gradë Celsius, ndërsa maksimalet e ditës parashihen të lëvizin ndërmjet 26-29 gradë Celsius”, njofton IHMK.

Do të fryjë erë kryesisht nga veriperëndimi me shpejtësi 1-3m/s.

Eugen Cakolli, nga Instituti Demokratik i Kosovës, ka folur për aktgjykimin e Gjykatës Kushtetuese lidhur me konstituimin e Kuvendit të Kosovës, duke deklaruar se Kushtetuesja nuk e ka mbështetur votimin e fshehtë për zgjedhjen e kryetarit të Kuvendit të Kosovës.

Cakolli tutje ka shtuar se nuk është aktgjykimi i Kushtetueses ashtu siç tha Lëvizja Vetëvendosje se iu dha e drejta me votimin e fshehtë.

“Në katër elementet kryesore që Gjykata Kushtetuese i ka trajtuar në rastin e fundit, besoj që janë këto vendime e para përcaktimi i afatit 30 ditor për përmbylljen e konstituimit, pra Kuvendi duhet të konstituohet më së largu deri më 26 korrik, problemi me këtë qëndron se nuk është përcaktuar se çka ndodh më 27 korrik. Çka nëse edhe deri më 16 korrik deputetët do të dështojnë që të përmbushin këtë obligim kushtetues”, ka deklaruar ai në Klan Kosova.

“E dyta është se gjykata ka përcaktuar që LVV është se ka të vërtetën ekskluzive të propozimit të kandidatit të Kuvendit. Veçse është tentuar që të evitohet pjesa e dytë në raport me këtë gjetje të gjykatës, e cila për herë të parë ka përcaktuar që e drejta për ta përcaktuar kandidatin për kryetar të Kuvendit është e lidhur drejtpërdrejtë e kushtëzuar me sigurimin e votave. Gjykata për herë të parë ndonjëherë, në vlerësimin tim, në mënyrë indirekte ka përcaktuar se kemi një subjekt politik parlamentar i cili është duke zvarritur çështjen e zgjedhjes së kryetarit të Kuvendit, duke propozuar kandidatin e njëjtë që nuk i ka votat e nevojshme”, tha ai.

“E treta Gjykata u ka përcaktuar obligime edhe partive të opozitës, respektivisht partive që nuk i kanë fituar zgjedhjet, ndonëse ka tentuar që ta bëjë këtë përmes çështjes së nënkryetarëve, por në parim ka kërkuar nga ata të veprojnë në mirëbesim dhe të gjejnë një zgjidhje nga situata aktuale. Pika e fundit është çështja e votimit të fshehtë, këtu mendoj se partitë kanë marrë aktgjykime të ndryshme, por që e vërteta është ndryshe nga ajo çfarë është proklamuar sot nga ana e Albulena Haxhiut, Glauk Konjufcës, dhe mbrëmë nga një postim i LVV. Gjykata nuk është e vërtetë se e ka proklamuar apo promovuar çështjen e votimit të fshehtë. Sipas nesh, Gjykata e ka përcaktuar se është vetëm një mënyrë e votimit që mund të përdoret ne seancën aktuale dhe ai është votimi i hapur”, tha Cakolli.

Deputeti gjerman Johannes Volkmann, i cili është edhe nipi i ish-kancelarit Helmut Kohl ka deklaruar në Bundestag se të gjitha vendet e BE duhet ta njohin pavarësinë e Kosovës.

Gjatë një debati për vazhdimin e pjesëmarrjes së trupave gjermane në misionin paqeruajtës të KFOR-it, Volkmann shprehu mbështetje të qartë për shtetin e Kosovës, duke u bazuar edhe në vendimin e Gjykatës Ndërkombëtare të Drejtësisë që legjitimon pavarësinë e saj.

Gjithashtu, deputeti gjerman bëri thirrje për anëtarësimin e Kosovës në Këshillin e Evropës.

Ambasadori i Kosovës në Gjermani, Faruk Ajeti, ndau videon e fjalimit të tij në rrjetet sociale, duke e falënderuar për mbështetjen.

“Faleminderit Johannes! Ndërsa fjalimi i fundit i Helmut Kohl në Bundestag ishte më 1 korrik 1999, nipi i tij debutoi me një përkushtim të fuqishëm për Kosovën,” shkroi Ajeti në Facebook.