Avokati Arianit Koci i është drejtuar kryeministrit në detyrë, Albin Kurtit, duke thënë se ky i fundit e ka mundësinë të zhbllokojë situatën e krijuar në kuvend, lidhur me moskonstituimin e këtij institucioni. Koci ka thënë edhe se insistimi në kandidaturën e Albulena Haxhiut, s’është bindje politike por ‘‘kapriçio personale’’.

Avokati ka thënë edhe se, situata aktuale është bllokim i qëllimshëm institucional.

‘‘Ngulmi me Albulena Haxhiun nuk është më bindje politike, as e drejtë e fituar në zgjedhje. Është kapriçio personale – që po e mban peng Kuvendin e Kosovës, po i ngrin proceset dhe po i djeg milionat e popullit. Paraliza është totale: përfaqësimi politik nuk funksionon, ekonomia është e ngujuar, shteti po mrizon. Ju keni mundësi me e zhblloku këtë situatë. Keni fuqi, keni ndikim. Sepse kjo tashmë nuk është më përballje me kundërshtarët politikë. Është bllokim i qëllimshëm institucional’’, ka shkruar mes tjerash ai.

Postimi i plotë:

1. Albin Kurti,

Ngulmi me Albulena Haxhiun nuk është më bindje politike, as e drejtë e fituar në zgjedhje.

Është kapriçio personale – që po e mban peng Kuvendin e Kosovës, po i ngrin proceset dhe po i djeg milionat e popullit.

Paraliza është totale: përfaqësimi politik nuk funksionon, ekonomia është e ngujuar, shteti po mrizon.

Ju keni mundësi me e zhblloku këtë situatë.

Keni fuqi, keni ndikim.

Sepse kjo tashmë nuk është më përballje me kundërshtarët politikë.

Është bllokim i qëllimshëm institucional.

Dhe pasojat po bien mbi shtetin. Mbi qytetarin.

E populli po sheh. Po kupton. Po mban mend.

Në anën tjetër, me fitoren në zgjedhjet e fundit dhe me pozicionin që e keni sot, ju takon juve me e marrë rolin përbashkues.

Nuk është më koha për inate personale, as për ngulm në kandidatura që nuk i kanë votat e duhura.

Sepse mbi të gjitha – me opozitën nuk jeni në armiqësi.

Janë kundërshtarë politikë, por janë deputetë të këtij vendi – me të njëjtin legjitimitet nga qytetarët, si ju.

Thellësisht besoj që qëllimin e keni të njëjtë, të gjithë ju – pozitë e opozitë:

Ta forconi shtetin dhe t’ua siguroni qytetarëve një jetë më të mirë.

Prandaj, ndërrimi i kandidaturës – në rastin tuaj – nuk është humbje e betejës politike.

Përkundrazi – është fitore. Madje fitore e madhe, sepse po e jepni një zgjidhje kreative, po e shtyni procesin përpara, po e çoni shtetin drejt funksionalitetit.

E këtë mund ta bëjë vetëm një burrështetas – dikush që është mbi mentalitetin primitiv të kasabasë sonë politike.

Merreni përgjegjësinë që e keni. Ndryshojeni kandidaturën dhe zhbllokojeni Kuvendin.

Mos e bëni Kosovën kolateral të kokëfortësisë.

Unë, si qytetar i këtij vendi – si njeri që ia don të mirën Kosovës dhe nuk ka atdhe tjetër – nuk do të ndalem.

Do të kërkoj përditë dhe pa kompromis, që Kuvendi të funksionalizohet.

Arianit Koci

26 Qershor 2025

Prishtinë

Rrjedha e lumenjve në Kosovë aktualisht është nën mesataren e tyre.

Kjo sipas institutit Hidrometeorologjik të Kosovës (IHMK) është si pasojë e mungesës së reshjeve.

“Sipas matjeve dhe monitorimeve hidrologjike nga rrjeti shtetëror hidrometrik, aktualisht lumenjtë në Kosovë, kanë rrjedha nën mesataret e tyre. Kjo si pasojë e deficitit të reshjeve sidomos gjatë muajve të pranverës dhe mungesës së borës dhe qëndrueshmërisë së sajë gjatë dimrit”, thuhet në një njoftim të IHMK-së.

Sipas njoftimit edhe pse ka pasur reshje, ato kanë qenë në formë të rrebesheve të shiut dhe lokale, të cilat shpejt janë larguar nga pellgjet.

Sipas IHMK-së situata e njëjtë është në shumicën e lumenjve, por më e rënduar është në lumin Drini i Bardhë.

“Si pasojë, paraqitja e thatësirës së theksuar hidrologjike me prurje të ulëta, rënjie të niveleve të ujërave nëntokësore nëpër akuifere. Efekte gjatë muajve të verës, në furnizim me ujë, bujqësi, hidro energji etj”, thuhet në njoftim.

Kryeministri në detyrë i Republikës së Kosovës, Albin Kurti, tha se tani Kosova nuk është më vështruese e kësaj padrejtësive ndaj shqiptarëve në Luginë të Preshevës.

“Imagjinata në tablo nuk bën kompromis me heshtjen. Ngjyrat e Luginës, ekspozitë që rrahë me ritmin e ekzistencës dhe nuk mbulohet nga statistikat e padrejtësisë. Në Preshevë, Medvegjë dhe Bujanoc, shqiptarët jetojnë çdo ditë në përballje me diskriminimin dhe shtypjen dhe shfrytëzimin dhe përjashtimin nga institucionet, e sidomos me atë që njihet si pasivizim i adresave, apo spastrim i ftohtë etnik nëpërmjet metodave burokratike e administrative”, u shpreh kryeministri Kurti në fjalën e tij.

Ai tha se tani Kosova nuk është më vështruese e kësaj padrejtësie, dhe se me vendimet e saj është përherë pranë jush, gjithnjë e më afër jush dhe praninë do ta rrisim nga viti në vit.

“Nëpërmjet kësaj ekspozite, e gjithë Kosova e ndjen Luginën më afër. Ju keni sjellë këtu copëza jete Lugine, që vetëm thellësia e imagjinatës dhe gjerësia e përvojës suaj i ka ndjerë. Ju faleminderit që e sollët atë këtu edhe në këtë formë estetike! Ju faleminderit që nuk pushoni së krijuari e së angazhuari! Dhe, mbi të gjitha, faleminderit që nuk shkëputeni nga përkatësia!”, tha kryeministri Kurti.

“Ngjyrat e Luginës” është një rrëfim përmes artit për identitetin, qëndresën dhe frymën krijuese të shqiptarëve të Luginës. Kjo ekspozitë është pjesë e një cikli prezantimesh që do të udhëtojë nëpër kryeqendrat shqiptare me synim forcimin e lidhjeve kulturore mbarëkombëtare.

Mbi Urën e Ibrit në Mitrovicë të martën janë kryer testime, por Qeveria në detyrë nuk ka qenë e informuar se kush po i kryen ato.

Dy ditë më vonë bëhet e ditur se personeli i një kompanie të kontraktuar nga Bashkimi Evropian ka kryer testimet teknike në urë.

“Personeli i angazhuar në testimet teknike të kryera në Urën e Mitrovicës është i një kompanie private të kontraktuar nga Bashkimi Evropian”, ka thënë KFOR-i në një përgjigje për KOHËN.

Në testimet e së martës ishin të angazhuar punëtorë të shumtë, kamionë të rëndë e pajisje të ndryshme.

Zëvendësministri në detyrë i Infrastrukturës, Hysen Durmishi, pati thënë se ministria ka kryer testimet vitin e kaluar, e se për testimet e 24 qershorit pati shtuar se “ne nuk jemi duke bërë kurrfarë testime dhe nuk jemi të informuar kush po bën testime në urë”.