Pas lajmit se Islanda i është bashkuar Irlandës, Spanjës, Holandës dhe Sllovenisë duke u larguar nga Eurovision 2026, 17 artistë dhe interpretues portugezë që po marrin pjesë në konkursin e përzgjedhjes së këngëve, Festival da Canção, kanë njoftuar se refuzojnë të përfaqësojnë Portugalinë nëse fitojnë garën.
Pjesëmarrësit në konkursin e brendshëm për të zgjedhur një përfaqësues paraqitën një deklaratë, duke protestuar kundër pjesëmarrjes kontraverse të Izraelit në konkurs.
Nënshkruesit përfshijnë Cristina Branco, Bateu Matou, Rita Dias, DjoDje, Beatriz Bronze (Evaya), Francisco Fontes, Gonçalo Gomes, Inês Sousa, Jorge Gonçalves (Jacaréu), Marquise, Nunca Mates o Mandarim dhe Pedro Fernandes.
“Me fjalë dhe me këngë, ne veprojmë brenda mundësive që na janë dhënë. Ne nuk pranojmë bashkëpunim në shkeljen e të Drejtave të Njeriut. Pavarësisht ndalimit të Rusisë nga Eurovision 2022 për arsye politike (pushtimi i Ukrainës), u habitëm kur pamë se i njëjti qëndrim nuk u mor ndaj Izraelit, i cili, sipas Kombeve të Bashkuara, po kryen akte gjenocidi kundër palestinezëve në Gaza”, thanë ata.
Transmetuesi portugez RTP ka lëshuar një deklaratë në përgjigje të fjalëve të artistëve.
“Pavarësisht vendimit të artistëve që e mbështesin deklaratën, RTP do të organizojë përsëri Festivalin da Canção dhe do të riafirmojë pjesëmarrjen e saj në Festivalin e Këngës Eurovision 2026”.
Salvador Sobral, i vetmi artist portugez që fitoi Eurovisionin, kritikoi qëndrimin e RTP-së në një video në rrjetet sociale, në të cilën akuzoi transmetuesin portugez për “frikacakëri politike”.
Zemërimi ka arritur edhe tek publiku portugez, i cili ka nisur një peticion duke kërkuar tërheqjen e menjëhershme të Portugalisë nga Eurovision.
I nënshkruar tashmë nga më shumë se 22,000 njerëz, dokumenti thekson se vota e RTP-së në favor të pjesëmarrjes së Izraelit “e vendos Portugalinë në anën e gabuar të historisë”.
“Ky qëndrim është i papranueshëm përballë katastrofës humanitare që po vazhdon dhe ofensivës ushtarake në Rripin e Gazës, si dhe përballë skandaleve të manipulimit të votave që njollosën edicionin e vitit 2025 në Bazel, duke dëshmuar paaftësinë e organizatës (EBU) për të frenuar politizimin e ngjarjes”, thuhet në të.
Javën e kaluar, pjesëmarrja e Izraelit në Eurovision 2026 u konfirmua nga EBU. Nuk u mbajt asnjë votim për pjesëmarrjen e Izraelit në asamblenë e përgjithshme të EBU-së, dhe si rezultat, Irlanda, Spanja, Holanda dhe Sllovenia konfirmuan se do ta bojkotonin ngjarjen përgjithmonë.
Dje, pas një takimi të bordit të transmetuesit RÚV, Islanda u bë vendi i pestë që iu bashkua bojkotit.
Ata thanë në një deklaratë se pjesëmarrja e Izraelit “ka krijuar përçarje midis anëtarëve të Unionit Evropian të Transmetimeve (EBU) dhe publikut të gjerë”.
Transmetuesi shtoi më tej se pjesëmarrja nuk do të ishte “as burim gëzimi dhe as paqeje”, duke marrë parasysh opinionin publik në Islandë dhe reagimin ndaj asamblesë së përgjithshme të EBU-së javën e kaluar.
Eurovisioni i vitit të ardhshëm – edicioni i 70-të i konkursit – do të zhvillohet në Vjenë më 16 maj 2026.
