Presidentja e Republikës së Kosovës, Vjosa Osmani, ka pritur sot në një takim të veçantë futbollistët e Kombëtares, të cilët i ka nderuar me dekorata shtetërore për përfaqësimin e dinjitetshëm të vendit në arenën ndërkombëtare.
Në këtë ceremoni, krahas futbollistëve, ishin të pranishëm edhe kryetari i Federatës së Futbollit të Kosovës (FFK), Agim Ademi, si dhe përzgjedhësi i „Dardanëve“, Franco Foda. Dekorimi i futbollistëve vjen si shenjë mirënjohjeje për angazhimin dhe emocionet që i dhuruan popullit gjatë gjithë ciklit kualifikues.
Ky vlerësim nga kreu i shtetit u bë vetëm një ditë pas ndeshjes vendimtare kundër Turqisë në stadiumin „Fadil Vokrri“. Megjithëse Kosova pësoi një humbje minimale me rezultatin 0–1, paraqitja e tyre u vlerësua lart për luftën sportive dhe shpirtin garues të treguar në fushë.
Gjatë takimit, Presidentja Osmani u shpreh se futbollistët janë ambasadorët më të mirë të shtetit dhe se rrugëtimi i tyre mbetet një frymëzim për gjeneratat e reja, pavarësisht rezultatit të fundit në semafor.
