Kryetari i Prishtinës, Përparim Rama përmes një shkrimi në Facebook u shpreh se po i shfrytëzojnë “të gjitha kapacitetet alternative” për ta menaxhuar situatën me mbeturinat në kryeqytet, të shkaktuar nga ndërprerja e shërbimeve të Ndërmarrjes “Pastrimi”.
Sipas tij kjo situatë është “kulmi i papërgjegjësisë institucionale dhe i një praktike të përsëritur të shantazhit”.
“Përkundër miliona eurove të investuara ndër vite, shërbimi i kësaj ndërmarrjeje ka qenë i paqëndrueshëm dhe, për fat të keq, është përdorur si instrument shantazhi për interesa të ngushta”, shkroi Rama.
Më tej Rama ai tha se si kryetar i Prishtinës siguron që “qytetarët nuk do të penalizohen për shkak të kalkulimeve politike të askujt”.
“Gjatë gjithë vikendit, ekipet tona alternative kanë qenë dhe vazhdojnë të jenë në terren, 24 orë, për të rikthyer situatën nën kontroll”.
Ai shtoi se që nga dita e hënë, shërbimi do të rikthehet në normalitet.
“Qytetarët e kryeqytetit as nuk duhet e as nuk meritojnë të përballen me situata të tilla që cënojnë shëndetin publik dhe dinjitetin qytetar, dhe ju siguroj që kjo nuk do të ndodhë më!”
“Po ashtu, më lejoni të jem i qartë: si kryetar i Prishtinës, nuk kam ardhur për tu bërë pjesë e pazareve politike. Nuk marr pjesë në takime të fshehta ku negociohen interesa personale, e as nuk bëj koalicione për të bllokuar apo siguruar favore politike. Qëndrimi im është i pandryshueshëm – gjithmonë në interes të qytetarëve”, shkroi ai.
Rama premtoi se sabotimet do të marrin fund.
“Fatkeqësisht, logjika e bllokadës dhe shantazhit është bërë mjet i politikbërjes, duke përfshirë edhe ndërmarrjen “Pastrimi”, e cila ka ndërprerë një shërbim jetik për qytetin. Por më lejoni t’ju them me bindje: epoka e sabotimeve dhe e keqpërdorimit të parasë publike merr fund tani, përfundimisht”.
“Nga e hëna, e rikthejmë një shërbim të denjë dhe të qëndrueshëm për qytetarët tanë – ashtu siç e meritojnë”, shkroi ai.
Rama i falënderoi qytetarët dhe ata që u mobilizuan për ta mbajtur pastërinë e kryeqytetit.
Ata, sipas tij, e kanë kuptuar tashmë “skemën e sabotimeve që po bëhen në kurriz të qytetarëve”.
