Zyra e Delegacionit të Bashkimit Evropian në Tiranë njoftoi sot se dita e katërt e Festivalit të Letërsisë Evropiane (FELT 2025) do t’i kushtohet lexuesve të rinj, me aktivitete të shpërndara në disa institucione arsimore dhe kulturore të kryeqytetit.
Në Gjimnazin e Gjuhëve të Huaja “Asim Vokshi”, shkrimtarja austriake-sllovene Maja Haderlap dhe përkthyesja Blerta Lazebeu do të lexojnë fragmente nga veprat e tyre dhe do të diskutojnë me nxënësit për rolin e letërsisë në ruajtjen e kujtesës, ballafaqimin me të kaluarën dhe identitetin në një botë të globalizuar.
Ndërkohë, në Gjimnazin “Protagonistët”, autori grek Christos Kythreotis do të zhvillojë një bisedë me të rinjtë rreth temave të identitetit, rinisë dhe migracionit.
Më pas, dita zhvendoset në Shtëpinë e Evropës me masterclass-in e shkrimit krijues të Dario Voltolinit dhe një bisedë me Nadia Terranovën. Në Fakultetitn e Historisë dhe Filiologjisë, Philippe Collin do bashkëbisedojë me studentët e gazetarisë dhe komunikimit mbi podcast-et, median dhe historinë.
Mbrëmja mbyllet në Qendrën Kulturore Tulla me një bisedë mbi veprën e Wisława Szymborska-s me Michał Rusinek dhe një diskutim me Christos Kythreotis mbi rininë, identitetin dhe migracionin në letërsinë bashkëkohore.
Delegacioni i BE-së fton publikun të shfletojë programin e plotë të ditës së katërt dhe të bëhet pjesë e Festivalit të Letërsisë Evropiane në Tiranë.
