Kryeministri i Shqipërisë Edi Rama, ka dhënë një intervistë për median italiane “Il Giornale” ku ka folur për ngërçin e krijuar për marrëveshjen në Itali.
Teksa thotë se Shqipëria nuk ka asnjë përgjegjësi, kreu i qeverisë, nënvizon se Evropa duhet të ndërtojë një plan të qartë strategjik, për të luftuar emigracionin e paligjshëm.
“Jo, sepse ne nuk kemi asnjë përgjegjësi në ekzekutimin e marrëveshjes, përveç asaj të dhënies së disponueshmërisë totale nëpërmjet koncesionit të juridiksionit italian në territorin e dy qendrave”, thotë Rama.
Gjithashtu Rama komenton edhe zgjedhjet në SHBA. Ndryshe nga 8 vite më parë kur u rreshtua në krah të demokratëve amerikanë, në këto zgjedhje Edi Rama thotë se nuk mbështet asnjë nga kandidatët.
“Unë nuk jam duke mbështetur askënd, por duke ditur se ajo fushatë elektorale e pafund dhe shumë përçarëse do të përfundojë më në fund, më ndihmon të marr frymë më lehtë“, tha Rama.
