I akuzuari i tretë për vrasjen e Liridona Ademajt, Kushtrim Kokalla, paraqet sot mbrojtjen e tij para trupit gjykues në Gjykatën Themelore në Prishtinë. Kokalla, ish-pjesëtar i FSK-së, ngarkohet për bashkëkryerje në vrasje të rëndë dhe moslajmërim të veprës penale.
Sipas aktakuzës, Kokalla dyshohet se shërbeu si urë lidhëse mes djalit të dajës së tij, Naim Murselit, dhe ekzekutorit Granit Plava. Megjithëse ai pretendon se e refuzoi kërkesën e Murselit për ta kryer vrasjen vetë, prokuroria thotë se ai ndërmjetësoi takimin që çoi në marrëveshjen prej 30 mijë eurosh për vrasjen e të ndjerës.
Rrëfimi i Kokallës: „Më luti për një vit“ Në dëshmitë e mëparshme të dhëna në polici, Kokalla ka zbardhur prapaskenat e këtij krimi makabër. Ai ka deklaruar se Murseli e kishte lutur vazhdimisht për rreth një vit që ta kryente vrasjen, kërkesë të cilën ai thotë se e kishte refuzuar prerazi.
Detajet tronditëse nga dëshmia e tij:
-
Takimi i ditës kritike: Më 29 nëntor 2023, Murseli i ishte drejtuar me fjalët: „Sot duhet të kryhet kjo punë“.
-
Rrëfimi në hotel: Pas vrasjes, ndërsa po qëndronin në një hotel në Prishtinë për t’u marrë në pyetje si dëshmitarë, Murseli i ishte drejtuar Kokallës me fjalët: „E kreva këtë punë“.
-
Frika dhe heshtja: Kokalla u arsyetua se nuk e kishte lajmëruar rastin më herët sepse ishte i shokuar dhe i frikësuar për sigurinë e familjes së tij nga Naim Murseli.
Marrëveshjet dhe paratë Në dosjen e prokurorisë thuhet se Kokalla kishte marrë 300 euro nga Murseli për një këst kredie, ndërsa Granit Plavës i ishin dhënë 500 euro, për të cilat Kokalla pretendon se nuk e dinte arsyen e pagesës. Një ditë më parë, i akuzuari Granit Plava deklaroi se Murseli i kishte premtuar liri brenda dy viteve, pagë dhe punë të sigurt në këmbim të marrjes së përgjegjësisë për krimin.
Procesi gjyqësor po vazhdon me ballafaqimin e këtyre dëshmive kontradiktore, teksa Kokalla përballet me akuzat e rënda që mund t’i kushtojnë me burgim afatgjatë.
