I akuzuari i tretë për vrasjen e Liridona Ademajt, Kushtrim Kokalla, ka deklaruar në seancën gjyqësore të sotme se nuk ka pasur asnjë rol në organizimin e krimit dhe ka mohuar kategorikisht se ka ndërmjetësuar mes të akuzuarve të tjerë.
Gjatë dëshmisë së tij, Kokalla theksoi se kontaktet dhe takimet me Naim Murselin dhe Granit Plavën nuk kanë pasur lidhje me veprën penale për të cilën ngarkohet. Ai mohoi të ketë qenë pjesë e ndonjë marrëveshjeje për vrasjen e të ndjerës.
Pretendimet për presionin në polici Mbrojtja e Kokallës, e udhëhequr nga avokati Ndrec Dodaj, u fokusua në procedurat e arrestimit dhe intervistimit. Kokalla konfirmoi se ishte vetëdorëzuar pas thirrjes nga policia, por pretendoi se para intervistimit zyrtar, hetuesit e kishin akuzuar pa praninë e avokatit. „Më thanë që ti je kryesori në këtë punë, ti e ke bërë të gjithë skenarin. Unë u thashë se nuk kam të bëj me këtë rast“, deklaroi i akuzuari, duke shtuar se gjatë intervistimit zyrtar nuk ka pasur dhunë fizike ndaj tij.
Arsyetimi i takimeve: „Hyna në kredi për Naimin“ Kokalla dha një version ndryshe për takimet e dendura me të pandehurit e tjerë. Ai pohoi se arsyeja pse po i qëndronte afër Naim Murselit ishte një kredi prej 25 mijë eurosh që kishte marrë për djalin e dajës së tij.
-
Takimi në Bërnicë: Ai tregoi se si kishte shkuar te shtëpia e re e Murselit së bashku me Granit Plavën, por sipas tij, bisedat ishin të rëndomta dhe jo për qëllime kriminale.
-
Numri i telefonit: Kokalla pranoi se ia kishte përcjellë numrin e Granit Plavës Naim Murselit përmes aplikacionit WhatsApp, pasi ky i fundit ia kishte kërkuar.
Akuzat e Prokurorisë Përkundër këtyre mohimeve, aktakuza e ngarkon Kokallën se në bashkëkryerje me Naim Murselin dhe Granit Plavën ka kryer veprën penale „Vrasje e rëndë“. Prokuroria pretendon se pasi Kokalla refuzoi ta kryente vrasjen vetë, ai gjeti Granit Plavën dhe e njoftoi me Murselin, duke u dakorduar për shumën prej 30 mijë eurosh.
Përveç vrasjes, Kushtrim Kokalla ngarkohet edhe për veprën penale „Moslajmërimi i veprave penale apo kryesve të tyre“, pasi dyshohet se ishte në dijeni të skenarit por nuk njoftoi organet e rendit.
