Deputeti i Aleancës për Ardhmërinë e Kosovës (AAK), Besnik Tahiri, ka ngritur shqetësime serioze gjatë mbledhjes së Komisionit për Legjislacion lidhur me projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme.
Gjatë diskutimit, Tahiri shpërfaqi tri çështje kryesore që, sipas tij, bien ndesh me aktgjykimet e Gjykatës Kushtetuese dhe standardet ligjore në fuqi:
-
Mungesa e konsultimit publik: Tahiri vuri në dukje se projektligji nuk i është nënshtruar konsultimit publik, një obligim që buron nga neni 49 i Rregullores së Punës së Qeverisë. Sipas tij, kjo përbën shkelje procedurale që cenon transparencën.
-
Delegimi i kompetencave përmes akteve nënligjore: Deputeti kritikoi faktin që Byrosë dhe drejtorit të saj u jepet e drejta që procedurat e verifikimit t’i rregullojnë përmes akteve nënligjore. Ai theksoi se kjo është në kundërshtim me Gjykatën Kushtetuese, pasi çështje të tilla duhet të përcaktohen drejtpërdrejt me ligj.
- Advertisement - -
Retroaktiviteti i debatueshëm: Tahiri ngriti alarmin për parashikimin e retroaktivitetit në projektligj, duke theksuar se kjo bie ndesh me legjislacionin aktual dhe cenon sigurinë juridike të qytetarëve.
“Institucionet t’i shërbejnë shtetit, jo partive” Në përmbyllje, Tahiri theksoi se ky projektligj nuk duhet të krijojë një strukturë paralele institucionale apo një „tigër prej letre”, por një mekanizëm funksional që i shërben drejtësisë.
„Sot është një parti në pushtet, nesër mund të jetë një tjetër; prandaj institucionet duhet të jenë në shërbim të shtetit dhe qytetarëve, jo të subjekteve politike”, deklaroi ai.
Pavarësisht kritikave, debati rreth këtij projektligji mbetet një nga temat më të nxehta në Kuvend, ndërsa opozita po kërkon që dokumenti të harmonizohet plotësisht me vërejtjet e Gjykatës Kushtetuese përpara se të hidhet në votim.
