Në Gjykatën Themelore të Prishtinës po mbahet seanca për fjalën përfundimtare në procesin gjyqësor për sulmin terrorist në Banjskë, ku prokurori i rastit, Naim Abazi, ka kërkuar dënimin maksimal për të akuzuarit.
Prokurori Abazi ka kërkuar që të akuzuarit Blagoje Spasojeviq, Vladimir Toliq dhe Dushan Maksimoviq të shpallen fajtorë për veprat penale që u vihen në barrë dhe të dënohen me burgim të përjetshëm. Sipas Prokurorisë, pesha e veprimeve të tyre dhe pasojat e sulmit të 24 shtatorit kërkojnë ndëshkimin më të lartë të paraparë me ligjet e Republikës së Kosovës.
“Vetëm një dënim i tillë reflekton peshën e krimit të kryer dhe seriozitetin e cenimit të rendit kushtetues”, deklaroi prokurori Abazi gjatë prezantimit të fjalës përfundimtare.
Cenimi i rendit kushtetues dhe sigurisë kombëtare Prokuroria argumenton se sulmi i organizuar në Banjskë ishte një tentativë e drejtpërdrejtë për të destabilizuar vendin dhe për të cenuar integritetin territorial të Kosovës. Për këtë arsye, kërkesa për burgim të përjetshëm vjen si pasqyrim i rrezikut të lartë që ky grup terrorist i ka kanosur sigurisë kombëtare.
Procesi gjyqësor po zhvillohet nën masa të rrepta sigurie, ndërsa fjala përfundimtare shënon fazën finale përpara se trupi gjykues të tërhiqet për të marrë vendimin e fundit mbi fajësinë dhe lartësinë e dënimit për të akuzuarit.
