Policia e Kosovës njofton se për 24 orë ka shqiptuar 1,782 gjoba në trafik.
Sipas policisë, gjatë 24 orëve të fundit janë evidentuar disa aksidente në trafikun rrugor, 1 aksident trafiku me fatalitet, 24 kanë qenë me lëndime, ndërsa 28 me dëme materiale.
Policia njofton se janë arrestuar 9 persona, ndërkaq 5 të tjerë janë dërguar në mbajtje.
Një fëmijë rreth katërvjeçar ka vdekur tragjikisht në Ferizaj.
Zëdhënësi i Policisëpër rajonin e Ferizajt, Kanun Veseli, ka thënë për Reporteri se fëmija është goditur nga një veturë në fshatin Dardani në oborrin e shtëpisë, derisa ngasësi i makinës ka lidhje familjare me viktimën.
“Me datën 22.06.2025 rreth orës 18:45, nga stacioni policor në Viti jemi njoftuar se në ambulancën e fshatit Pozheran është dërguar një fëmijë rreth moshës 4-vjeç, i cili është konstatuar pa shenja jete nga mjeku kujdestar. Dyshohet se fëmija është goditur nga një veturë në fshatin Dardani, në oborrin e shtëpisë, ndërsa ngasësi – ka lidhje familjare me viktimën”, ka thënë Veseli.
I dyshuari është shoqëruar në stacionin policor në Ferizaj, ndërsa në vendin e ngjarjes kanë dalë njësitet përkatëse policore për të ekzaminuar vendin.
Për të gjitha veprimet policore është njoftuar prokurori i shtetit, i cili ka urdhëruar inicimin e rastit “Shkaktim i rrezikut të përgjithshëm” dhe ngasësi i veturës është ndaluar në mbajtje për 48 orë.
Dasma nis me 500 milionë dollarë… me sa do të përfundojë? Venecia s’po fle, protestuesit janë ngritur, jahti “Koru” po shkumon… dhe spektakli sapo ka nisur!
Jeff Bezos dhe Lauren Sanchez sfidojnë protestuesit, nisin dasmën marramendëse në Venecie me një festë të çmendur “FOAM PARTY” në jahtin 500 milionë dollarësh!
Jeff Bezos dhe e fejuara e tij, Lauren Sanchez, nuk i kanë vrarë mendjen aspak protestuesve antikapitalistë që u zotuan të “bllokojnë kanalet” për të sabotuar dasmën e tyre. Përkundrazi, ata kanë shpërthyer në një festë të shfrenuar me shkumë në bordin e super-jahtit 500 milionë dollarësh “Koru”, duke çelur me glamur javën e dasmës më të përfolur të vitit!
Çifti, bashkë me miqtë VIP, janë nisur drejt Venecies për dasmën madhështore më 27 qershor, teksa protestuesit i kanë mbushur rrugët me parulla si “Nuk ka vend për Bezos” dhe “Venecia nuk është park lojnash për oligarkë”.
Por Bezos (61) dhe Sanchez (55) kanë treguar se nuk i ndalin dot — të veshur vetëm me bikini dhe rroba banje, mes reve të shkumës dhe diellit kroat, janë fotografuar duke festuar në bordin e jahtit luksoz, në ndalesën e fundit në ishullin Cres, Kroaci, përpara zbarkimit në Itali.
Në skenat që siguroi DailyMail.com, shihen të dy të përqafuar, të qeshur, në mesin e shkumës, ndërsa të ftuarit hidhen nga jahti në det, përdorin paddleboard-et dhe shijojnë verën mes luksit të papërshkrueshëm.
Në sfondin e festës, një pankartë “Happy Birthday” zbukuron jahtin, ndërsa raportohet se festohej edhe ditëlindja e 19-të e djalit të Lauren, Evan.
Edhe një varkë policie iu afrua për pak çaste jahtit, por shpejt u largua pa ndërhyrë.
Dasma e shumëpritur pritet të zgjasë një javë dhe të kushtojë rreth 15 deri në 20 milionë dollarë, me tre evente madhore në lokacione të ndryshme — mes tyre, një gala më 26 qershor në një kloster privat.
Organizatorët e dasmës, firma elitare Lanza & Baucina Limited, e cila ka organizuar dasmat e George & Amal Clooney e Salma Hayek & François-Henri Pinault, deklaruan se janë bërë përpjekje për të minimizuar ndikimin negativ në jetën e venecianëve, ndërsa çifti ka dhuruar fonde për disa organizata bamirësie lokale.
Por kjo nuk ka mjaftuar për të shuar zemërimin e banorëve, që fajësojnë fluksin e turistëve dhe oligarkëve për çmimet marramendëse të banesave dhe mbipopullimin e qytetit në kulmin e sezonit.
Aktivistja Federica Toninello paralajmëroi:
“Bezos nuk do të arrijë kurrë te Misericordia!”, duke zbuluar se protestuesit kanë “molë” që po zbulojnë planet e dasmës.
Megjithatë, Kryetari i Bashkisë së Venecies, Luigi Brugnaro, i ka dalë në krah çiftit:
“Është nder që e zgjodhën Venecien — qyteti po konfirmohet sërish si skenë globale!”
Spektakli vetëm sa ka nisur… dhe bota po e ndjek çdo hap!
Këngëtarja e njohur Filloreta Raçi – Fifi, ka hapur zemrën në një intervistë emocionale me moderatoren Alketa Vejsiu, duke ndarë për publikun rrëfime të ndjera nga rrugëtimi i saj artistik, sfidat personale dhe sakrificat që qëndrojnë pas suksesit të sotëm.
Me një ndjeshmëri që e karakterizon, Fifi ka treguar se hapat e parë në muzikë i ka hedhur falë një gjesti të paharrueshëm të nënës së saj, e cila nuk kurseu as florinjtë e vet për të mbështetur vajzën në ndjekjen e ëndrrës.
“E mbaj mend sikur sot kur kam nisur të bëj muzikë, kur nëna ime mori florinjtë e saj dhe i shiti për të m’i dhënë mua, që të bëhesha unë”, kujton Fifi me emocion.
Por rruga drejt suksesit nuk ka qenë aspak e lehtë. Ajo ka ndarë me publikun një ndjenjë të fortë ankthi që e ka shoqëruar gjatë krijimit muzikor – një frikë e përhershme se do ta humbte frymëzimin në momentin më të papritur.
“Kisha një frikë çka nëse harroj çfarë jam duke shkruar, atë vijën melodike që e kam bërë në kokë… çka nëse e harroj?”.
Në rrëfimin e saj, Fifi nuk i kurseu as reflektimet për marrëdhëniet personale dhe ndikimin që kanë patur në gjendjen e saj emocionale. Ajo foli për momentet kur ndjen keqardhje apo faj, por edhe për vetëdijesimin se çdo njeri duhet të ngrihet vetë nga rrëzimet.
“Askush nuk duhet me ardh me ta dhënë dorën, duhet të ngrihesh vetë. Fajtori i parë që ti e fajëson është partneri që ke në krah, sepse ti je verbuar prej asaj smirës që të kanë ushqyer të tjerët”.
Të paktën katër persona janë vrarë në një sulm rus me raketa dhe dronë gjatë natës në kryeqytetin e Ukrainës, Kiev, tha ministri i Brendshëm.
Në një postim në rrjetet sociale, Ihor Klymenko deklaroi se u goditën zona banimi, spitale dhe infrastruktura sportive.
“Një pjesë e tërë e një ndërtese shumëkatëshe banimi u shkatërrua” në lagjen Shevchenkivskyi më të goditur, thotë ai, duke shtuar se disa njerëz janë të bllokuar nën rrënoja.
Në rajonin e Kievit, një grua u vra dhe dy persona të tjerë u plagosën në sulmin ajror rus, tha kreu rajonal Mykola Kalashnyk.
Ushtria ruse nuk ka komentuar për këtë çështje.
Shërbimi i emergjencave të Ukrainës DSNS thotë se 13 persona – përfshirë dy fëmijë dhe një grua shtatzënë – u plagosën në Kiev.
Një numër zjarresh raportohen në të gjithë kryeqytetin.
Një hyrje në një nga stacionet nëntokësore të metrosë së qytetit u dëmtua në sulmin rus, thonë zyrtarët lokalë.
Shumë banorë të Kievit e kaluan natën duke u strehuar në stacione të tilla.
Në javët e fundit, Rusia ka kryer sulme masive ajrore në Kiev dhe qytete të tjera të Ukrainës.
Irani e paralajmëroi presidentin Donald Trump se do të aktivizonte sulme me qeliza të fjetura brenda SHBA-së nëse sulmohej, në një mesazh të dërguar një ditë para sulmeve amerikane, thonë burimet.
Paralajmërimi thuhet se i arriti Trumpit nëpërmjet një ndërmjetësi në samitin e G7-ës në Kanada javën e kaluar, të cilin Trump e la më herët, thanë dy zyrtarë amerikanë dhe një person me njohuri për kërcënimin.
Administrata e tij, si dhe agjencitë e zbatimit të ligjit në qytetet kryesore, janë në gatishmëri të lartë për çdo hakmarrje të mundshme brenda Shteteve të Bashkuara.
Departamenti i Sigurisë Kombëtare paralajmëroi dje se “konflikti i Iranit po shkakton një mjedis kërcënimi të shtuar në Shtetet e Bashkuara”.
Mund të ketë një mundësi më të madhe për sulme terroriste në SHBA “nëse udhëheqja iraniane lëshon një vendim fetar që bën thirrje për dhunë hakmarrëse kundër objektivave në atdhe”, një nga format mund të jetë, nisja e sulmeve kibernetike në rrjetet amerikane dhe të synojë zyrtarët e qeverisë amerikane.
Një burim i lartë iranian i tha sot agjencisë së lajmeve Reuters se pjesa më e madhe e uraniumit të pasuruar në centralin bërthamor Fordoë ishte zhvendosur përpara se SHBA-të ta sulmonin atë dje.
Uraniumi duhet të pasurohet deri në 90% që të përdoret në një armë bërthamore. Agjencia Ndërkombëtare e Energjisë Atomike (IAEA) thotë se Irani ka rreth 400 kg uranium të pasuruar 60%.
I pyetur për vendndodhjen e uraniumit, Netanyahu tha: “Ne e kemi ndjekur këtë nga afër. Mund t’ju them se është një komponent i rëndësishëm i një programi bërthamor.”
“Nuk është komponenti i vetëm. Nuk është një komponent i mjaftueshëm. Por është një komponent i rëndësishëm dhe ne kemi informacione interesante për këtë, të cilat do të më falni nëse nuk i ndaj me ju”.
Në kundërshtim të përfshirjes amerikane në konfliktin mes Iranit dhe Izraelit, në SHBA ka pasur protesta këtë fundjavë.
Grupe njerëzish u mblodhën në Nju Jork dhe Los Angeles për të shprehur pakënaqësinë ndaj administratës Trump për përfshirjen e SHBA-së në konfliktin e Izraelit me Iranin.
Gjatë fushatës së tij zgjedhore, Trump u premtoi votuesve se do të ishte një “paqebërës dhe unifikues” në Lindjen e Mesme.
Mot me diell dhe vranësira të pakta, pritet të mbizotëroj gjatë kësaj të hëne në vendin tonë.
Temperaturat minimale do të lëvizin ndërmjet 10-12 gradë Celsius, ndërsa maksimalet e ditës parashihen të lëvizin ndërmjet 26-29 gradë Celsius.
Sipas IHMK-së do të fryjë erë nga drejtimi i verilindjes me shpejtësi 1-5m/s.
Kuvendi i Kosovës do të mblidhet edhe këtë të hënë në një përpjekje të dështuar, meqenëse nuk janë votat e mjaftueshme për të zgjedhur kryetarin e ri të legjislaturës së nëntë.
Tridhjetepesë vazhdime të deritanishme përfunduan me dështime për shkak të mungesës së votave të Lëvizjes Vetëvendosje, Guxo e Alternativa për Albulena Haxhiun kryetare e re e Kuvendit.
Deputetët e zgjedhur do të mblidhen sot për herë të tridhjetegjashtë në vazhdimin e seancës për konstituimin e Kuvendit të ri duke filluar nga ora njëmbëdhjetë.
Gjykata Kushtetuese ende nuk ka kthyer përgjigjen mbi mënyrën e fshehtë të votimit të kërkuar për interpretim nga grupi parlamentar i Aleancës për Ardhmërinë e Kosovës.
Zyrtare: Amsal Krasniqi rinovon me Vushtrrin — mbetet edhe një sezon në klub!
Pavarësisht shumë zërave për largimin e tij, talenti i ri i futbollit, Amsal Krasniqi, do të vazhdojë të jetë pjesë e skuadrës së Vushtrrisë edhe për sezonin e ardhshëm.
19-vjeçari ka vendosur të mbetet besnik ndaj klubit ku ka shpërthyer si një nga lojtarët më premtues të kampionatit. Me këtë vendim, Krasniqi i jep qetësi dhe stabilitet ekipit, në një kohë kur spekulimet për të ardhmen e tij kishin marrë hov.
Konfirmimi zyrtar është bërë nga vetë klubi: “Amsal Krasniqi edhe një sezon me Vushtrrin!”
Qindra njerëz u mblodhën të dielën për të protestuar kundër iniciativës së NATO-s për rritjen e shpenzimeve ushtarake dhe rrezikut të luftës me Iranin.
Protesta vjen dy ditë para një samiti të aleancës në Hagë, ku udhëheqësit pritet të diskutojnë rritjen e buxheteve të mbrojtjes.
“Le të investojmë në paqe dhe energji të qëndrueshme”, tha politikani belg Joe d’Haese duke iu drejtuar një turme në një park pranë vendit të samitit.
Edhe pse protesta u përqendrua te NATO-ja dhe lufta në Gaza, shumë iranianë u bashkuan në përgjigje të sulmeve të së dielës të kryera nga Shtetet e Bashkuara në tre centrale kryesore bërthamore iraniane.
Demonstruesit u panë duke mbajtur pankarta ku shkruhej “Jo luftë me Iranin” dhe “Duart larg Iranit”.
“Ne jemi kundër luftës. Njerëzit duan të jetojnë një jetë paqësore”, tha 74-vjeçari Hossein Hamadani, një iranian që jeton në Holandë. “Gjërat nuk janë mirë. Atëherë pse shpenzojmë para për luftë?” shtoi ai.
Arno van der Veen, zëdhënës i Koalicionit Kundër Samitit për Paqe dhe Drejtësi, i cili organizoi protestën, tha se roli i NATO-s është bërë problematik tani që SHBA-të vendosën t’i bashkohen Izraelit në luftën në Iran.
“Nëse ka një hakmarrje nga Irani tani, e cila do të ishte e drejtë dhe legjitime sipas ligjit ndërkombëtar, atëherë ne, si Holandë, do të ishim gjithashtu në luftë me Iranin”, tha ai për Euronews.
“Hapi tjetër është një luftë bërthamore. Dhe kjo është ajo për të cilën jemi jashtëzakonisht të shqetësuar, dhe pse mund të shohim se në momentin që blini më shumë armë, rriten shanset që edhe ju t’i përdorni ato. Dhe kjo është kërcënuese për jetën”, paralajmëroi ai.
Aktivistët anti-NATO shpesh kritikohen për qëndrimin gjoja pro-rus.
Megjithatë, Van der Veen theksoi se organizata e tij qëndron kundër imperializmit rus, ndërkohë që kundërshton edhe imperializmin amerikan.
“Të dy po përpiqen tani të ndajnë burimet natyrore në tokën e Ukrainës”, tha ai. “Popullsia e Ukrainës është viktimë e kësaj lufte, dhe gjithashtu popullsia e Rusisë, sepse të gjithë janë dërguar në ushtri”.
Holanda po pret samitin vjetor të NATO-s, që fillon të martën, me udhëheqësit botërorë që takohen të mërkurën.
Udhëheqësit planifikojnë të bien dakord për shpenzime më të larta për mbrojtjen, siç u nxit nga Presidenti i SHBA-së Donald Trump.
Bisedimet pothuajse përfunduan javën e kaluar, derisa kryeministri i Spanjës Pedro Sánchez i tha Sekretarit të Përgjithshëm të NATO-s, Mark Rutte, se t’i kërkoje Spanjës të shpenzonte 5% të PBB-së së saj për mbrojtje ishte “e paarsyeshme dhe kundërproduktive”.
Që kur Rusia pushtoi Ukrainën më shumë se tri vjet më parë, vendet e NATO-s kanë rritur shpenzimet e mbrojtjes. Por gati një e treta ende nuk e përmbushin objektivin aktual prej 2%.
Samiti është nën masa të rrepta sigurie, me operacionin më të madh të sigurisë të ndërmarrë ndonjëherë në Holandë, të quajtur “Mburoja Portokalli”.
Ai përfshin mijëra oficerë policie dhe ushtarakë, dronë, zona ndalim-fluturimi dhe ekipe të sigurisë kibernetike.
STORM ofron lajmet dhe përditësimet më të fundit për zhvillimet socio-politike dhe jo vetëm, duke i mbajtur lexuesit të informuar dhe të angazhuar me përmbajtje interesante dhe të rëndësishme, për Kosovën, rajonin dhe botën, në të gjitha segmentet e jetës.
Për informacione: info@storm-rks.com
Për Marketing: marketing@storm-rks.com
© 2024. Storm
